101-inik ukiulik: Nunatsinni namminersortut utoqqaanersaat soraarninngorpoq
- Sulerusussuseq meeraaninniilli pigisimavara.
Nunatsinni namminersortut utoqqaanersaat, Anthon Geisler, soraarninngorpoq. Taassuma Ilulissani Illumiut Aqqutaani kioskiutini ukiunit 50-init amerlanerusuni ingerlappaa.
Ullormili 101-liiffiani naatsorsuutiginngisaanik pisoqarpoq.
- Iluanngillunga iterama, imannak eqqarsaraluarpunga aqagu pitsaaneruguma suliartussallunga. Kisianni tassa nakorsiarama, suleqqunngilaanga. Unitsippaanga, Anthon Geisler oqarpoq.
- Taamanikkut eqqarsaatiginngikkaluarpara 101-iliiffiga ulloq suliffigissallugu kingulleq.
Illunnguaq Anthon Geislerip ukiorpassuarni pisiniarfiutigisimasaa taamaalilluni matuvoq.
Anthon Geisler Qeqertarsuup nunaqarfigisimasaani Aamaruutissani februaarip 21-ani 1919-imi inunngorpoq.
Kalaallini siullersanut ilaalluni iffiortutut Danmarkimut ilinniariarpoq. Ilinniakkanilu naammassigamiuk Ilulissanut 1952-imi nuuppoq.
- Kalerrippaanga aallassasunga novembarip 3-ani timiusiorfimmut suliartorlunga. Oqarpunga naamik uanga Ilulissanukarnianngilanga.
Ilulissanniikkusussimanngikkaluarpoq
Inuususseruttoramili Ilulissani sulerusussimanngikkaluarpoq.
- Ukiiginnariarlunga soraarlunga Danmarkimut uterniarlunga. Taanna ukioq ataaseq sivitsorpa?, Anthon illarluni oqarpoq.
Taamaalilluni Antuup pisiniarfiutini ukiuni 50-ini ammatippaa. Antuut kioskiutitaannginnermini 1960-kkunni aamma kaffibaariuteqarnikuuvoq.
Ukiullu 80-t sinnerlugit sulisimanini ima eqqaamasaqarfigaa:
- Inuusunninni ullut nuannersorpassuit, pilluarlunga nuannaarlunga qiimallungalu sulisimanera ulloq manna tikillugu puigorneq ajorpakka, ullut nuannersorpassuit atorsimagakkit pilluartorsuullunga.
Angut imminut pilersortuarsimasoq maanna isumagineqarnissaminik, tupinnanngitsumik pisariaqartitsilersimalluni utoqqaat illuaniippoq.
Ullullu tulliuttut nuannersumik atortarnissaat qularinngikkaluarlugu, ataatsimik qularisaqarpoq.
- 200-it angugunnannginnakkit, tassa eqqarsaatigisarpara inuunerma ulluisa kingulliit ulluni makkunani atorpakka, tassa eqqissivissara toqu. Uanga qilanaarisarpara eqqissillunga toqunissara massakkut.
