Nuuk Imeq saftimik tuniniaaqqilerpoq - puua utertittaganngorlugu
Nuuk Imeq saftinik nunatsinni tuniniaaqqilerniarpoq. Immiaaqqanik sodavandininillu maqitsisarfik tusagassiuutinut nalunaaruteqarluni taama allaaserisaqarpoq.
Allattoq Laura Aggernæs
juunip 23-at 2015 16:16
Nuuk Imermi nunatsinni saftinik tuniniaasarneq 2012-imi taamaatinneqarpoq, teknikkikkut ajornartorsiuteqarneq sukkunullu akitsuutit annertuallaarnerat pissutigalugit.
Pisisartut saftinik Nuuk Imermeersunik ujartuilernerisa kingorna saftinik tunisassiorneq misileqqinneqalerpoq.
AAMMA ATUARUK Nuuk Imeq: Sukkunut akitsuut peqqutigalugu 2-literinik saftiliorunnaarpugut
Saftit Aappaluttut, Qorsuit aamma Fersken-Ananas tunisassiarineqalerput, taakkua puiaasanut liiterip affaatut angitigisutut tuniniarneqassapput, taakkualu nuna tamakkerlugu tuniniarneqassallutik puuilu utertinneqarsinnaassallutik.
- Neriuppugut saftit pisiniarfinnit atuisunillu tigulluarneqarumaartut, Nuuk Imeq tusagassiuutinut taama nalunaaruteqarpoq.