Inatsisartut ataatsimiititaliaata meeqqanik sumiginnaaneq annilaarutigigaa
Ilaqutariinnermut, Naligiissitaanermut Isumaginninnermullu Naalakkersuisup Martha Lund Olsenip ataatsimiititaliamit siunersioqarneqarnerata kingorna taama sakkortutigisumik qisuariartoqarpoq, naalakkersuisummi ataatsimiititaliaq ilisimatippaa pisuni arlalinni inatsisinik unioqqutitsisoqarsimasoq.
Kommunit pineqartut marluusut meeqqanik inuusuttunillu sakkortuumik sumiginnakkanik nalunaarutiginninnerit iliuuseqarfigisarsimanngilaat.
Pisoq ima ilungersunartigaaq Martha Lund Olsenip politiit attaveqarfigisimallugit, pinerluttulerinermi inatsit ilumut unioqqutinneqarsimanersoq misissuiffigitinniarlugu.
Tassami meeqqanik inuusuttunillu ikiorsiisarneq pillugu Inatsisartut peqqussutaanni ima allassimasoqarmat; Kinaluunniit inatsisartut peqqussutaata matuma atortinneqarnerani peqataasoq pisortanik sullissitilluni suliffeqartilluniluunniit pinerluttulerinermi inatsimmi pinerluutit pillugit malittarisassat malillugit akisussaaffeqarpoq suliffik qinigaanikkut pigaluarpalluunniit.
Ilaqutariinnermut Peqqissutsimullu Ataatsimiititaliap nunatsinni kommunini allani marlunni assingusumik iliuuseqanngitsoortoqarsimasinnaanera ernumassutigaa. Taamaammallu Kommuneqarfik Sermersuumi Kommune Kujallermilu assingusumik nakkutilliisoqarnissaa ataatsimiititaliap piumasaraa.
Meeqqanut suliassaqarfimmi siuariarneq annertooq
Kommunilli pineqartut aappaata - Kommuneqarfik Sermersuup - nalunaarutigaa Sermersuumi meeqqanut suliassaqarfimmi siuariarneq annertooq pisimasoq.
Meeqqanut immikkoortortami atorfiit amerlineqarput, kingullermik sulisut sisamanik ilaneqarlutik, taamaalillutillu suliassat annikillisinneqarlutik. Meeqqanut, Ilaqutariinnut Atuarfeqarnermullu Ingerlatsivimmi pisortaq, Søren Valbak, naapertorlugu sullissisut tamarmik immikkut sulianik agguaqatigiissillugu 40-nik tigummiagaqartarput. Suliat taama amerlassusillit nammassisinnaagaat oqaatigisinnaallugu erseqqissaavoq.
Peqatigitillugu sulisut oqilisaanniarlugit ingerlatsivimmi immikkut sulianik tigooraaveqalersimavoq isumaginninnermut siunnersortinik ilinniarsimasunik pingasunik inuttalimmik.
Suliat meeqqanut tunngasut tamaasa tigusarpaat oqartussanullu pisussaasunut pilertortumik ingerlateqqittarnissaat isumagisarlugit. Innuttaasut saaffiginnittut siunnersorneqarnissaat ilitsersorneqarnissaallu, saaffiginnittarfimmi sulianik tigooraavimmit pilertortumik sullinneqartarput, Kommuneqarfik Sermersooq tusagassiorfinnut nalunaaruteqarluni taama allappoq.
