Obamap sakkulisarsinnaanermut inatsit sukateriffigeqquaa

Danmarks Radio nalunaarpoq ukiut marluk ingerlanerinnaanni aallaasersornerit taanna 141-saringaat.

Taamaattumik Rosenburgimi aallaasersorneq taanna USA-mi imminut nalilersoqqinnissamut tunngaviliivoq.

Amerikamiut iteqqipput alianartumik ilinniarfimmi aallaasersortoqaqqereersoq. Aammaaqqilluni takuneqaqqippoq angutip inuusuttup kamassaqaqisup uumissuinini ilinniartunut nalaatsornikkut naammattuukkaminut tutsikkaa.

Taama alianaqisumik pisoqartarnera sooruna USA-miinnaq takussaasoq?

Aallaasersortoqareernerata kingorna tusagassiortunik katersuutitsinermini mamiatsassimaqisoq præsident Obama taama aperivoq.

Præsident Obamap arlaleriarluni sakkulisarsinnaanermut inatsit sukateriffigeriartaraluarpaa, pinerili tamaasa aporfeqartarsimalluni. DR-ip USA-mi ilanngutassiortua Johannes Langkilde maannakkorpiaq Oregonimiittoq ima nalunaaruteqarpoq:

Præsidentip sukatererusulluni aporfigisartagai annerpaat tassaapput politikkikkut akerlilersuisuni, aammali USA-mi sakkuutillit isumaqatissarsiortarnerat pissaaneqaqisoq. Innuttaasut tunngaviusumik inatsimmi sakkulisarsinnaaneq piginnaatitaaffimittut isigaat,  præsidentimut inatsisip allanngortilaarnissaa maannamut ajornarluinnarsimavoq.

Obamalli tamanna uniffigiinnarusunngilaa.

- Nunarsuarmi kisiartaanngilagut tarnimikkut nappaatilinnik innuttaqartoq inoqatiminnik ajortumeererusuttunik. Nunarsuarmi kisiartaavugut nuna siuarsimasoq qaammataaluit ingerlaneri tamaasa taama aallaasersorfiusartoq, Obama oqarpoq.   

Sakkulisarsinnaanermut inatsisip sukateriffigineqarnissaa sorsuutigiuassavara, tusagassiortunik katersuutitsinermini taama oqarpoq.

Taama pisoqarneri tamaasa una qaqeqqittassavara. Taama pisoqarneri tamaasa oqartassaanga iliuuseeqarfigineqarsinnaangaluartoq - inatsisigulli allanngortittariaqarpavut, Obama oqarpoq.

Politiit marluk eqqaasseqatigitillugit aallaasersortoq toqutaavoq. Ilisimaneqanngilarli aallaasersorneranut sunarpiaq peqqutaanersoq.