Arctic Circle Race Sisimiuni aallartittoq

Inuit 194-it nunarsuarmi ujakkaarnerit sakkortunersaasa ilaanni unammillutik aallartipput. Ukioq manna Arctic Circle Racertoqarnera nalunaaqutaq qulinut aallartinneqarpoq.

Sisimiuni sukkaniunniunneq aallartinneqartoq ulluni pingasuni ingerlanneqassaaq. Nunanit assigiinngitsunit 15-init ukioq manna peqataasoqarpoq. Ukunannga peqataasoqarpoq: Kalaallit Nunaat, Danmark, Savalimmiut, Canada, Finland, Belgia, Østrig, Tjekkia, Frankrig, Tyskland, Ungarn, Schweiz, Tuluit Nunaat, USA aamma Japan.

Tamanna Arctic Circle Racep siulittaasuata, Jens Klaus Lennertip nuannaarutigaa.

- Unammeqataasut tamarmik apuunnissaat soorunami naatsorsuutigaarput. Ukioq manna nalinginnaasumit aputikinnerummat upalungaarsimasussat amerlanerutippagut. Taamaammat ilaasut innaarsuillu nakkutigineruagut, taanna oqarpoq.

Ukioq kiannerusoq

Nunatta kitaani pisarnermiit kiannerunera aaqqissuisunut nalornisitsivoq. Ujakkaarfissaasumimi pisarnerminiit aputeqannginnerusoq, Jens Klaus Lennertip, Sermitsiamut februaarimi oqaatigaa.

Ullunili kingullerni apillualaarnikuummat, ujakkaartussallu nunap timaaniittussaammata ajornavianngitsoq, aaqqissuisoq oqarpoq.

Unammeqataanissamut peqataaniarlutik nalunaartut 200-ugaluarput, sisamallu pisinnaajunnaarput. 

Ujakkaartussat unammiffissaat 100 aamma 160 kilometerinik isorartussuseqarput.

Arctic Circle Race 1998-mi aaqqissuunneqaqqaarpoq. Sermtsiaq naapertorlugu, unamminissat pingasut corona pillugu killilersuineq peqqutaalluni 2020-mi, 2021-mi, 2023-milu taamaatinneqarput.