Tuluit Nunaata Palæstina naalagaaffittut akueriniaraa

Tuluit Nunaata Palæstina naalagaaffittut sapaammi akuerissagaa naatsorsuutaavoq.

Akuersissuteqartoqarneranili ullormiit ullormut nutaamik naalagaaffeqalernavianngilaq.

Tamanna tuluit inatsiseqarnermut ministeriata aamma ministeriunerup tulliata, David Lammyp tusagassiorfimmut Sky Newsimut erseqqissaatigaa.

- Akuerissuteqarnissamut alloriarneq marluinnik naalagaaffinngortitsinissamut periarfissaqartitsiniarnitsinnik pissuteqarpoq, taanna oqarpoq.

Aviisi Financial Times naapertorlugu ministeriunerup Keir Starmerip Tuluit Nunaata Palæstinamik akuersissuteqarneranik nalunaaruteqarnera sapaammi piffissami ilisimaneqanngitsumi videokkut oqaaseqarneratigut pissasoq naatsorsuutigineqarpoq.

Tamatuma kingorna Naalagaaffiit Peqatigiit New Yorkimi ataatsimeersuarneranni sapaatip akunnerata tulliani marlunngornermi aallartittumi akuersissuteqarneq pisortatigoortumik pissaaq.

Starmerip israelimiut naalakkersuisui Palæstinap naalagaaffinngornissaanut akerliusut piumasaqaatinik arlalinnik siunissami qaninnerusumi malinnilinngippata tuluit naalakkersuisuisa Palæstina naalagaaffittut akueriniaraat juulimi oqaatigaa.

Israel sakkutooqarnikkut pikisitsisunut Hamas akersuukkunnaarnissamut isumaqatigiissuteqarnissaa aamma Gazamut ikiuigasuartoqarnerutitsisinnaanissaanut akuersissuteqassasoq piumasaqaataagaluartoq, Reuters allappoq.

Tamatuma saniatigut Israelip Vestbreddenimik tiguaaniarnani uppernarsassagaa Palæstinallu naalagaaffittut pilersinneqarnissaanut marluinnik naalagaaffinngortitsinissamut periarfissiisumik eqqissititsisoqarnissaanik ingerlatsinissamut pisussaaffilerneq uppernarsassagaa piumasaqaataavoq.

- Juulimi nalunaaruteqartoqarnerata Qatarimullu saassussisoqarneratigut kingorna akiuukkunnaarallarneq unikkallarpoq, siunissarlu aarlerinarluni, David Lammy Sky Newsimut oqarpoq.

Nunat arlallit marluinnik naalagaaffinngortitsinissaq taperseraat

Israelip Qatar septembarip qulingiluaani saassuppaa. Saassussineq Israelip oqarnera naapertorlugu Hamasip siuttuinut naalagaaffimmi uuliaqarfiusumiittunut tunngassuteqarpoq.

Hamasimi ilaasortat tallimat toqutaapput, pikisitsinialli qullersaat saassussinermit aniguipput.

Qatar Israelip Hamasillu akornanni Gazami akiuukkunnaarnissamut isumaqatigiinniarnermi ingerlatsisuusimavoq.

Marluinnik naalagaaffinngortitsisoqarneratigut Palæstina Israelimut pituttorsimanani nammineq naalakkersuisoqalersinnaassaaq.

Palæstinap naalagaaffiani Vestbredden aamma Gaza ingerlatsivinnit assigiinngitsunit marlunnik tassa Palæstinamiut namminersorlutik oqartussaannit Fatah-mit aamma Hamasimit maannamut aqunneqarsimasut ilaanissaat naatsorsuutaavoq.

Nunat arlallit – matumani Danmark ilanngullugu – marluinnik naalagaaffinngortitsinissamut tapersiipput. Aamma nunat Palæstinamut naalagaaffittut suli akuersissuteqanngitsut.

Ilaatigut Frankrigip, Spaniap, Irlandip Norgellu Palæstina naalagaaffittut akueriniarlugu ukioq manna siusinnerusukkut nalunaarutigaat.

/ritzau/