KNR-imi oqaatsinut politikki

 

1. Tunngavik

Oqaatsinut politikki pillugu Inatsisartut inatsisaat nr. 7, 19. maj 2010-meersoq.

KNR-ip oqaatsinut politikkiata oqaatsinut inatsit malippaa.

2. Siunertaq

Siunertaavoq kalaallit oqaasiisa oqaatsitut tamakkiisutut inuiaqatigiinnilu atugaasutut qularnaarnissaat.

KNR Kalaallit Nunaanni tusagassiorfiit annersaattut, kisiartaallunilu innuttaasunik kiffartuussisussaatitaasutut, pingaarutilimmik pisussaaffeqarpoq sulinermini kalaallit danskillu oqaasiinik atuinissaminut, oqalunnikkut allannikkullu. Oqaatsinik atuineq ingerlanneqassaaq Kalaallit Nunaanni kikkulluunniit paasisinnaasaannik, taamaaliornikkut ineriartortikkumallugit kalaallit oqaasiisa ilitsoqqussatut oqaasiuneri aamma danskit oqaasiisaa allamiut oqaasiisut siullertut atugaanerat.

KNR innuttaasunik kiffartuussisutut siunniussivoq oqaatsit tungaasigut aporfiusut suliniuteqarfiginerisigut akornutaajunnaarsillugit arlariinnik oqaaseqarnerup inuiaqatigiinni iluaqutinngortinnissaanik.

KNR-ip isumagissavaa suliffeqarfimmi atorfeqavissut tamarmik immikkut oqaatsit tungaasigut pikkorissarnermik pisariaqartitsinerat pillugu, aammalu kulturikkut, oqaluttuarisaanikkut inuiaqatigiinnilu ingerlaatsit pillugit ilisimasaqarnerat pillugit oqaloqatigissallugit.

 

3. Assigiinngissuseq

Inuit assigiinngitsuunerat KNR-imi akueraarput, Kalaallit Nunaannilu sumiorpaluutsit immikkuullarissut atugaanerat inissaqartillutigu. KNR-imi kikkulluunniit tamaasa oqaloqatigisinnaasariaqarpagut, kalaaliunerat danskiunerat nunarsuatsinnilu allaneersuunerat apeqqutaatinnagit. Taama pissuseqarnissarput pisariaqarpoq KNR-imi atuisut pitsaanerpaamik kiffartuutissagutsigit.

Oqaatsit tungaasigut suliniut ”Ilitsoqqussaralugu oqaatsit ataatsit, allamiut oqaasii arlallit” KNR-ip peqataaffigalugulu tunniussaqarfigissavaa. Nunarsuarmioqataanermi tuluit oqaasii avaqqunneqarsinnaanngillat, oqaasersianillu tunioraasutut annersaammata KNR-ip ingerlatsinermini aamma eqqarsaatigisariaqarpai.

Atorfeqavissut tamarmik oqaatsinut politikkip piumasaqaataanik malinnissapput, pisortallu akisussaaffigaat oqaatsinut politikkip pissusissamisut malinneqarnera nakkutigissallugu.
Oqaatsinut politikkip piumasaqaataanut ilaatinneqanngillat sinerissami illoqarfinni nunaqarfinnilu ilanngutassiortut attaveqaatillu KNR-ip suleqatigisai.

 

4. Kukkuniiaasarneq

Ilungersuutigineqartassaaq radiukkut tv-kkullu aallakaatitat oqaasertaasa tamarmik kukkuneqanngitsuutinniarnissaat.
Kukkuniiaaneq pisassaaq oqaatsit ataasiakkaat oqaaseqatigiillu – oqaatsinit allaniit nutsikkat ilanngullugit – misissorneqarlutillu kukkuniiarneqarsimanissaat, allakkatigut oqalunnikkullu tamanut saqqummiunneqannginnerminni.

Aaqqissuisoqarfiit akisussaaffigaat suleqatigiit akornanni ataatsimik arlalinnilluunniit aaqqissuisoqarfimmi sulianik kukkuniiaasartussanik toqqaanissartik. Aamma aaqqissuisoqarfiit akisussaaffigaat suliat pitsaassusaannik misissuisarnissamut periusissiornissaq.

 

5. Oqaatsinut siunnersorti

KNR-imi qanimut suleqatigineqassaaq Naalakkersuisoqarfiit oqaatsinut siunnersortitut atorfeqartitaat, ilaatigut tusagassiuutini kalaallit oqaasiisa kukkuneqanngitsumik atugaanerannik qularnaarinninniarluni suliaqartumik. Suleqatigiinnerup tamatuma qularnaassavaa sulisut oqaatsinik atuinerminni ineriartortuarnissaat.

 

6. Sumiorpaluutsit

Sulisut radiukkut tv-kkullu aallakaatitassiortartut kalaallisut oqaatsit kitaata qeqqani sumiorpaluutsinut, allattaatsimullu toqqammaviusut, atorlugit aallakaatitsinerit ingerlattassavaat. Aallakaatitanili qaaqqullugit oqaloqatigineqartut namminneq sumiorpalunnertik atuinnartassavaat.

Qaanaamiit, Tasiilamiit Ittoqqortoormiiniillu sumiorpaluutsit atorneqartillugit nalilersorneqartassaaq kitaamiusuumut nutserisoqarnissaa pisariaqarnersoq.

Allakkatigut saqqummiussat tamarmik kalaallisut allattaaseq akuerisaq atorlugu allassimasassapput.

Tusarnaartartut isiginnaartartullu allagaat – soorlu pilluaqqussutit – sumiorpalunnerit issuarlugit allatat, sapinngisamik allassimanerattut atuarneqartassapput. Taamaattorli aaqqissuisoqarfiup aamma/imaluunniit atuaasut nalilertassavaat sulisup piginnaasai misilittagaalu malillugit ilumut tamanna piviusunngortinneqarsinnaanersoq. Piumasaqaatigineqarsinnaanngilaq atuaasut ataasiakkaat sumiorpaluutsinik assigiinngitsunik tamanik ilisimasaqarnissaat.

Sinerissami sumiorpaluutsit tammatsaaliornissaat eqqarsaatigalugu KNR-imi ulloqartitsisoqartassaaq sumiorpaluutsinik assigiinngitsunik samminninnernik imaqartinneqartartussanik.

 

7. Oqaatsitigut maligassiuisut

Oqaatsinik pingaartitsineq nalornisigineqaqqunagu – kalaallit danskillu oqaasii apeqqutaatinnagit – KNR-imi immikkoortortat pingaarnerit oqaatsitigut maligassiuisussanik toqqaassapput. Oqaatsitigut maligassiuisut isumagisassaannut ilaassaaq Kalaallit Nunaanni oqaatsitigut ineriartornerup malinnaaviginissaa. Ilisimasatik misilittakkatillu naapertorlugit oqaatsit tungaasigut ilisimasassanik uparuussisassapput aqqutissiuillutillu, KNR-imilu immikkoortortanut oqaatsinik atuinerat pillugu siunnersuisassallutik.

Oqaatsinut politikkip matuma atuutsinneqalerneranut atasumik immikkoortortat pingaarnerit tamarmik oqaatsitigut maligassiuisussanik toqqaassapput. KNR-imi HR-imut immikkoortortap Naalakkersuisullu oqaatsinut siunnersortaata suleqatigiillutik oqaatsitigut maligassiuisussat suliassaat akisussaaffiilu suliarissavaat tunniullugillu.

 

8. Oqaatsit allatat

KNR-i nittartakkamigut, tekstTV-kkut TV-kkullu aallakaatitassiat oqaasertaasigut oqaatsinik allatanik saqqummiisarpoq. Allakkiat tamarmik kalaallisut allattaatsip akuerisap maleruaqqusai malissavaat.

Nittartakkatigut tekstTV-kkullu saqqummiussat kalaallisut danskisullu ataatsikkut saqqummiunneqartassapput, ataatsikkoorsinnaanngippatalu kalaallisoortaa siulliusassaaq.

Allatat tamanut saqqummiunneqartinnagit kukkuniiarneqareersimassapput imm. 4 malillugu, oqaaseqatigiiliatigut kukkuluttuutit, naqinnerliukkat kukkusallu allat pinngitsoorumallugit.

TV-kkut nutserlugit oqaasertalersuutit tamakkerlugit ikkussorneqartassapput. Sukkasuumilli sivisuumillu oqaluttoqartillugu oqaatsit isumaat allanngortinnagit nutsikkanik eqikkaasoqartarsinnaavoq. Tamanna pisariaqalersarpoq kalaallisut oqaatsit ilaat takillutillu sungiussisimanngitsunut atuaruminaassinnaasarmata, taamaammallu oqaaserisat ilaat atuartut/isiginnaartut ilaannit angumerinngitsoorneqarsinnaasarlutik.

 

9. Oqaatsitigut piginnaasanik nalunaarsuisarneq

KNR-ip sulisut oqaatsitigut piginnaasaat malinnaavigiuartassavai. Oqaatsitigut piginnaasat qanoq inneri malillugit sulisut oqaatsitigut piginnaasaannik pitsanngortitsiniarluni iliuuserisassat aallarnisarneqartassapput.

Ataasiakkaat pisariaqartitsinerat naapertorlugu issiaqatigisamit ilitsersorneqartarneq, ataasiakkaarluni arlaliulluniluunniit pikkorissarnerit imaluunniit oqaatsinik ilinniarfimmiititsinerit ingerlanneqartassapput.

Ilinniartuutit atorfeqalerlaalluunniit oqaatsitigut piginnaasaat nalilersorneqaqqaartassaaq radiukkut TV-kkulluunniit ilanngutassanik atuaatinneqalersigatik.

 

10. Suliffiup iluani avammullu paasissutissiinerit allakkiallu

Suliffiup iluani paasissutissiinerni oqaatsit amerlanerit paasilluarsinnaasaat atorlugit paasissutissiisoqartassaaq. Nalunaarutit sulisunut tamanoortut kalaallisut danskisullu allanneqartassapput.

Avammut allakkiat paasissutissiinerillu oqaatsit marluk atorlugit ingerlasassapput. Allaffigeqatigiinnermili oqaatsit aappaannaat atorlugit illuatungerisaq allattarpat, oqaatsit pineqartut atorneqassapput.

Saqqummersitat allagarsiussallu tamarmik kalaallisut danskisullu pisassapput, minnerpaamillu kalaallisoortaa siulliullugu. Allakkiat suulluunniit tamanut saqqummiunneqartussat minnerpaamik ataasiarlutik kukkuniiarneqartassapput, kalaallisuujunerat, danskisuujunerat oqaatsilluunniit allat atorlugit allagaanerat apeqqutaatinnagu.

Allaffigitigut

KNR attaviginiarlugu ataani immersuivik atorlugu, emailikkulluunnit info@knr.gl 

imaluunniit uunga allaffigisinnaavatsigut:

KNR | Box 1007 | Issortarfimmut 1A | 3900 Nuuk

Sianerit (+299) 361500 | Fax. (+299) 361502

Immikkoortortaqarfik
CAPTCHA
Naqinnerit assimiittut allakkit.