KNR-imi aallakaatitassiornermi ileqqorissaarneq - aallakaatitassiornermi ileqqorissaarnissamut, pitsaasumillu tusagassiutilerinissami ileqqorissaarnissamut malittarisassat

 

KNR-ip inuiaqatigiinnut sullissisussaatitaaneranut atatillugu killiligaanani oqaaseqarsinnaatitaanermut paasissutissiisinnaatitaanermullu soqutiginninnissaa tunngaviuvoq, tamatumanilu inuit ataasiakkaat suliffimmi avataatigut inuuneqarsinnaatitaanerinut, inuiaqatigiillu pisunik malinnaatinneqarnissaminnik, tamanullu soqutigineqarsinnaasunik ilisimatinneqartarnissaminnik pisariaqartitsinerinut tunngatillugu inatsisitigut atuuttutigut qulakkeerneqarsimasut tunngaviupput. Tamanna tunuliaqutaralugu ataasiakkaanut tunngassuteqartut, inuiaqatigiit pisariaqartitsinerinut KNR tamatigut oqimaaqatigiissitsilluni naliliisassaaq.

Tassunga atatillugu ukiukitsut timikkut, tarnikkut ileqqorissaarnissakkulluunniit ineriartornerinut annertuumik akornusiisinnaasunik, matumani pingaartumik atoqatigiittunik nakuusersernilluunniit aallakaatitsisoqartannginnissaa KNR-ip nakkutigissavaa.

Aallakaatitassiornermi ileqqorissaarnissamut, pitsaasumillu tusagassiutilerinissami ileqqorissaarnissamut tunngatillugu immikkoortut tullinnguuttut, KNR-imi ulluinnarni sulinermi aaqqissuinermi malittarisassatut isigineqassapput:

 

Peqataasussanik isumaqatigiissuteqarneq

Peqataasut tassaapput, aallakaatitassiami oqaaseqaratik peqataaginnaratik aallakaatitassiami oqaaseqartarlutik peqataasut.
KNR-ip aallakaatitassiaanut peqataasut, aallakaatitassiamut peqataaffigisaminnut atatillugu tunngaviatigut piumasaqaatinut paasinnilluarsimanissaat KNR-ip pingaartippaa. Piumasaqaatit peqataasunit paasineqarsimanissaat KNR-imi atorfillit akisussaaffigaat.

Isumaqatigiissutip pineqartup ilusaa imarisaalu aallakaatitassiap pitsaassusissaanut, peqataasussallu tusagassiuutinut tamanut annguttartunut peqataasarnermi sungiussisimanissaa soorunalimi tunngaviussapput. Aallakaatitassiat aallakaatinneqartut kingunerisinnaasaannik nalilersuissalluni KNR-ip tamatigut suliassaraa. Matumani pingaartumik peqataasumut, oqaaseqaatimi kingunerisinnaasaanik paasisimasaqarnissaanik naatsorsuutigineqarsinnaanngitsumut attaveqarnissaq pingaartumik atuuppoq.

Meeqqat inuusuttulluunniit ilanngutassiani peqataatillugit, KNR immikkut ittumik eqqummaarinnissaaq, apeqqarissaarnerlu mianerineqartariaqartunik imaqartillugu, immiussinissaq sioqqullugu angajoqqaat/angajoqqaatut akisussaatitaasut akuersitinneqaqqaartassapput. Immiussinermi meeraq immikkut ittunik paasissutissiitillugu, aallakaatitassiap avammut saqqummiutinnginnerani akuersissummik pissarsisoqaqqaartariaqarnersoq, aallakaatitassiornermi suleqataasup aamma nalilersussavaa. KNR-ip aallakaatitassiaani inuit sanngiitsut immikkulluunniit eqqugaasimasut peqataatillugit, aallakaatitassiornermi ileqqorissaarnissaq taamatulli atuuppoq.

Aallakaatitassiornissami sammineqartussaq, sumullu attuumassuteqarnersoq pillugit KNR-ip aallakaatitassiaanut peqataasut ilisimatinneqarsinnaatitaapput. Taamaakkaluartoq immikkut pisoqartillugu, assersuutigalugu tamat soqutigisaannut tunngassuteqarlutik pissutsinik isornartorsiorneqarsinnaasunik saqqummiussinissami, tunngavissaq tamanna avaqqunneqarsinnaavoq.

Inuit tatigalugit attaveqarfiit pineqartillugit immikkut illuinnartumik pisoqartillugu, KNR taamaallaat kinaassutsimik isertuussisunik peqataatitsisinnaavoq. Assersuutigalugu peqataasup inuunera, isumannaassuia atugarissaarneralu eqqarsaatigineqarsinnaaput. Kinaassutsimik isertuussisoqartillugu peqataasup kinaassusianik KNR ilisimannissaaq, pisunilu ataasiakkaani kinaassutsimik isertuussinissat pisortamit akuerineqarsimassapput. Malittarisassat taakku malinneqartillugit, immiussineq naammassineqareersoq peqataasup aallakaatitassiamut peqataasimanerminik tunuartitsisinnaanngilaq.

 

Filmiliuutinik mikrofoninillu toqqorsilluni immiussineq

Filmiliuutinik mikrofoninillu toqqorsillutik KNR-imi atorfillit immiussisinnaapput aatsaat:

• inummut inunnulluunniit filmiliuutinik mikrofoninillu toqqorsilluni immiunneqartunut sanilliullugu oqaluttuassaq tamanut soqutiginaateqarpat – imaluunniit
• tusagassiutilerinermi pisariaqartumik uppernarsaatissaq allatigut pissarsiarineqarsinnaanngippat.

Matumani aamma pinerit tamaasa qaninnertut pisortarisaq immiussinissamut siumoortumik akuersissuteqarsimassaaq. Tamatuma saniatigut toqqorsilluni immiussat aallakaatitassiornermi qanoq saqqummiunneqassanersut, malitsigisaanik pisortaq akuersissuteqassaaq.

Toqqorsilluni immiussanik atuinissami, toqqorsilluni immiussisimanermi peqataasut allaqqunneqarsinnaanngitsumik aallaavittut akuersiteqqaarlugit atorneqarsinnaapput.

KNR aallakaatitassiornermini, ataasiakkaat naleqqutinngitsumik pineqaratarsinnaanerinut illersussavai. Taamaattumik immikkut ittumik pisoqartillugu aamma assitanik ersarlutsitsisoqarsinnaallunilu nipinik allanngortitsisoqarsinnaasarpoq. Isertorluni immiussinermi malittarisassanut naapertuuttumik aatsaat oqarasuaatikkut oqaloqatigiittunik avammut saqqummiussisoqarsinnaavoq. Immiussaq tunngaviatigut paasisassarsiornissamuinnaq atugassiaasimasoq, toqqorsilluni mikrofonitut isigineqanngilaq.

 

Immiussanut/assinut toqqorsivik

KNR-ip immiussanut/assinut toqqorsivianit aallakaatitsisoqartillugu, qanga immiussaasimasunik aallakaatitsisoqarnera ersarittassaaq. Pingaartumik nutaarsiassanik aallakaatitsisoqartillugu, toqqorsivimmit aallakaatitsisoqarnersoq paatsuungassutigineqarsinnaavoq. Paatsuuisinnaanerit pinngitsoortinniarlugit, toqqorsivimmit immiussanik assinilluunniit tigulaarisoqarnera tunngaviusumik skærmimi allassimasariaqarpoq. Ilutigalugu allanut tunngassutilinnut assiliartaliiniarluni, siunertanut allanut atugaasimasunik toqqorsivimmit atuisoqartillugu immikkut sissuertoqartassaaq. Mianerineqartariaqartut immikkut isiginiarneqartassapput – assersuutigalugu inuit imerajuttutut, ikiaroortartutut napparsimasutulluunniit peqataasimasut. Imaassinnaavoq taakku inuunerminni ingerlariaqqissimallutik atornerluinerminnik napparsimanerminnilluunniit aniguisimallutik, immiussaasimasuni saqqummernissaminnut kissaateqanngitsut.

 

Aallakaatitseqqinnerit
Aallakaatitseqqinnerni tullinnguuttut eqqarsaatigineqartariaqarput:

a) aallakaatitassiaq immikkut isumaliutigilluarnissamut eqqarsaatigilluarnissamulluunniit aqqutissiuussilluni mianerineqartariaqartunik paasissutissaqarnersoq samminninnersorluunniit?

b) tassunga tunngassuteqarluni nutaamik pisoqartillugu aallakaatitseqqittoqarnersoq, tassungalu atatillugu iliuuseqartariaqarneranik kinguneqarsinnaanersoq?

c) Piffissap ingerlanerani nutaamik pisoqarsimanera patsisaalluni pineqartumit attuumassuteqartuniilluunniit oqaaseqaatinik nutaanik pissarsisoqartariaqarnersoq?

d) aallakaatitseqqinnissami pineqartoq/attuumassuteqartut aallakaatitseqqinnissaq pillugu ilisimatinneqassappat?

 

Atortussanik tunniussineq

Immiussat assilluunniit assilineri aallakaatinneqareersimasut nammineq atugassianngorlugit tunineqarsinnaapput. Taamatut tunniussinissami KNR-ip Toqqorsiviata ingerlattassavaa, ilutigalugulu pisinnaatitsissutinut tunngasut aamma eqqarsaatigisassallugit. Assilinernik tunniussinissami kinaassutsimik isertuussinissami, suliffiullu avataatigut inuunermik akornusersueqqusaannginneq pillugu malittarisassat malinneqarnissaat aamma piumasaqaataavoq.

Taamaakkaluartoq suli avammut saqqummiunneqarsimanngitsunik KNR-i tunniusseqqusaanngilaq. Tunniussisoqarnissaanik piumasaqaatitalerlugu pisortanit (politiinit unnerluussisuutitaasunilluunniit) saaffiginnissutit, KNR-ip pisortaaneranut innersuunneqartassapput.

 

Naqqiuteqarneq

Kukkunerit piviusut KNR-ip naqqiuteqarfigisarpai.

Inunnut ataasiakkaanut suliffeqarfinnulluunniit akornusiisinnaasunik paasissutissanik ilumuunngitsunik KNR-i saqqummiussisimappat, tusagassiut paasissutissanik ilumuunngitsunik saqqummiussivigineqarsimasoq aqqutigalugu kukkuneq piaartumik naqqiuteqarfigineqassaaq. Naqqiuteqarnissaq qaninnertut pisortarisamit akuerineqarsimassaaq.

 

Naapertuilluartuliorneq

Isornartorsiuinerit saassussinerillu akerlilerneqarsimasariaqarput, taamaattumillu aallaavittut akissutit ataqatigiissinneqarsimasariaqarlutillu assinganik isigineqartariaqarput.

Paasissutissat kikkunnulluunniit ajoqusiisinnaasut, kanngunarsaasinnaasut narrujuummisitsisinnaasulluunniit avammut saqqummiunneqannginnerini, siullertut pineqartumut saqqummiunneqarnerisigut misilinneqaqqaartariaqarput.

 

Kinaassutsimik isertuussilluni kinaassutsimik allannguineq

Aallakaatitassiornermut atatillugu kinaassutsimik isertuussilluni kinaassutsimik atorfiliup allannguinissaani, filmiliuutinik mikrofoninillu toqqorsilluni immiussinermi malittarisassat matumani aamma atuupput. Sulianut eqqartuussisutigoortunut apeqqusiisunngortitsiniarluni, uppernarsaatinik ilumuunngitsunik aamma atuisoqaqqusaanngilaq.

 

Suliamut attuumassuteqarneq

Sulianut ataasiakkaanut allanulluunniit tunngassuteqartillugu, suliamut attuumassuteqarnermik ajornartorsiuteqarsinnaanersoq KNR-imi atorfillit eqqarsaatigeqqaartuaannassavaat. Assersuutigalugu sammisamut imaluunniit sammisamut atatillugu suliffeqarfimmut tunngatillugu sulisoq inuttut, aningaasaqarnikkut politikkikkulluunniit annertuumik soqutigisaqarnera pineqarsinnaapput. Soqutigisanut tunngatillugu assortuuttoqartillugu qaninnertut pisortarisaq peqatigalugu isumannaarneqassapput.

 

Inuit tatigalugit attaveqarfiit

KNR-ip inuit tatigalugit attaveqarfiini tunngaviusumik illersortarpai.

Avammut saqqummiunneqarsimanngitsunik KNR-imi atorfillit ilisimannittutut nassuiaateqartussaatitaanngillat:

a) paasisat kimit pissarsiarineqarsimanersut, kinaluunniit assiliisimanersoq allatigulluunniit assimik saqqummiisimanersoq.

b) peqataasup kinaassutsimi avammut saqqummiunneqarani peqataanissaminik akuersissuteqarsimasup kinaassusaa.

 

Inatsisinilli unioqqutitsisimasoqartillugu ukiuni sisamani amerlanerusuniluunniit pineqaatissinneqarsimasunut inissiisarfimmiisinneqarnissamik kinguneqarsinnaasunut sulianut tunngatillugu ilisimasaqalersimalluni aallakaatitsisimanermi, aallakaatitsisimannginnermiluunniit atorfillit ilisimannittutut uppersarsaasinnaatitaaneri matumani pineqanngillat. Pillaatissap nalilerniarneqarnissaanut ilimagisat aalajangiisuugani, pillaatissaatitaasut killingat aalajangiisuuvoq.

Ilisimannittutut uppernarsaasiisoqassatillugu, uppernarsaaneq suliap naammassineqarnissaanut sunniuteqassasoq ilimagineqartariaqarpoq. Inuit tatigalugit attaveqarfiit illersorneqarnissaannit, suliap naammassineqarnissaa assortorneqarsinnaanngitsumik pingaartinneqassaaq.

Inuit tatigalugit attaveqarfiit KNR-ip tunngaviatigut uparuarsinnaavai. Pingaartumik oqaatigisaq nammineq soqutigisanut tunngassuteqarsinnaappat, allanilluunniit akornusiinissamik siunertaqarsimappat.

Inuit tatigalugit attaveqarfiit KNR-ip ajunngitsorsiassaqartinneq ajorpai, aallakaatitassiornissamili atugassanik inunnik immikkut ilisimasalinnik immikkut ittumik killilimmillu KNR atorfinitsitsisinnaavoq. Taamatulli atorfinitsitsisoqartillugu KNR-ip kiffaanngissuseqarnera, inuullu suliamut attuumassuteqarnera apeqquserneqaqqusaanngillat.

 

Suliffiup avataatigut eqqissilluni inuuneq

KNR akuerineqarsimatinnani, suliffiup avataatigut inuit inuunerinik akornusersueqqusaanngilaq.  Matumunnga atatillugu ”akuerineqarsimatinnani” nalinginnaasumik ima paasineqassaaq, akuersissummik tunniussisoqarsimanngitsoq, ataasiakkaallu eqqarsaatigalugit paasissutissat inuiaqatigiinnut saqqummiunneqarnissaannut annertuumik soqutiginaateqanngitsut. Nalornisoqartillugu qaninnertut pisortarisaq attavigineqartuaannassaaq.

Tamatuma saniatigut ataasiakkaat pillugit tusaamasat KNR-imi atorfillit mianersuuttassavaat. Tusaamasat aatsaat tamanit tusaamaneqarpata, siullertut tusaamasap ilumuussusia ilumuunngissusialuunniit uppernarsiniarlugu, inuup pineqartup saaffigeqqaarneratigut annerusumik iliuuseqarfigissanerlugu aaqqissuisoqarfimmiut eqqarsaatigisinnaavaat. Aappaattut tusaamasaq ilumoornersoq paasiumallugu pisortaqarfiit pineqartut paasiniaaffigineqarsinnaapput.

Nalornisoqartillugu qaninnertut pisortarisaq attavigineqartuaannassaaq.

KNR-imi atorfillit allakkat isertuunneqartut ataqqissavaat, akuerineqarsimatinnatillugu allakkap imaluunniit nalunaarutit matoqqasut nalunaarsukkalluunniit imaannik atuaasinnaatitaanngillat, soorluttaaq sulisoq peqataatinnagu inimi matoqqasumi imaluunniit oqarasuaatikkut oqaloqatigiinnermi oqaatigineqartunik immiusseqqusaanatillu tusarnaaqqusaanngitsut.

Inuup suliffiup avataatigut eqqissilluni inuuneranut tunngassuteqarlutik nalunaarutinik assinilluunniit KNR-imi atorfillit akuerineqartigatik ingerlatitseqqeqqusaanngillat, soorluttaaq naak tamanit ornigarfigineqartuni immiussisoqarsimagaluartoq tamanut saqqummiunneqannginnissaa piumasarineqarsimappat, pineqartup assiinik saqqummiusseqqusaanngitsut.

Nalinginnaasumik tamat soqutigisaannut tunngassuteqarluni tamanut saqqummiunneqarnissaa pineqartinnagu, inuup suliffiup avataatigut eqqissilluni inuuneranut akornusiisinnaallutik nalunaarutit pinngitsoortinneqassapput.

Immiussat toqumik, napparsimanernik ajutoornernilluunniit takutitsisut, tamat paasisaqarsinnaatitaanersut pineqartullu eqqarsaatigilluaqqaarlugit aatsaat tamanut saqqummiunneqarsinnaapput – matumani pinerluuteqarsimanermut ilisimannittut, ilaqutaasut eqqugaasullu ilanngullugit. Taamatulli katittut, atoqatigiinnermut tunngasut, aappariinnermut tunngasut il.il. ipput.

 

Imminorneq

Assersuutigalugu imminorneq pillugu pisimasunik aallakaatitsinermi, pisorluunniit aalajangersimasoq pillugu immikkut patsiseqarluni imminornerup oqaatigineqartariaqarnissaa eqqaassanngikkaanni, immimornernik imminoriarnernilluunniit KNR avammut saqqummiusseqqusaanngilaq.

 

Privatit

KNR-imi atorfillit akuerineqarsimatinnatik privatinut iseqqusaanngillat, piumaffigineqarnermikkullu privatimit qimagutissallutik.

Nunap immikkoortortaani illuutiniluunniit nalinginnaasumik kikkut tamat iserfigisinnaanngisaanni piginnittoq akisussaasorluunniit akuersiteqqaartinnagu immiussisoqaqqusaanngilaq. Matumani nunap immikkoortortai privatit, tamangajannulluunniit ammasut soorlu atuarfinni anitsiartarfissuit timersoqatigiiffiillu taamatorluinnaq malittarisassaqarput.

 

Aaqqissuineq

Killiligaanani oqaaseqarsinnaatitaaneq qulakkeerniarlugu KNR aaqqissuisussaatitaavoq. Imaappoq:

a) apeqqarissaarneq killorneqarani aallakaatinneqarnissaanik peqataasut sioqqutsisumik kingornaluunniit piumasaqaataannik KNR malinnissanngitsoq. Taamaattoqassappat, apeqqarissaarnermi piumasaqaataasut tamanut saqqummiunneqassanersut eqqarsaatigilluarneqassaaq.

b) apeqqarissaarneq killorneqarsimasoq, aallakaatitassarluunniit aallakaatinneqartinnagu aallataatitassiassaq akuerineqaqqaarnissaanik peqataasunit piumasaqaatit KNR-ip nalinginnaasumik malissanngikkai.

 

Pisuusaartitsineq
Avammut saqqummiunneqartup assitalernissaanut assit naammanngippata, pisimasoq pillugu pisuusaartitsinissaq pisariaqalersinnaavoq. KNR pisuusaartitsitillugu malittarisassat tullinnguuttut malinneqassapput:

a) Pisuusaartitsisoqartillugu pisuusaartitsinerup aallartinneranit naanissaata tungaanut pisuusaartitsisoqarnera pillugu nalunaarut skærmikkut tunngaviusumik saqqumitinneqartassaaq. Radiokkut aallakaatitsinermi isuusaartitsisoqartillugu, pisuusaartitsisoqarnera radiokkut ersarissumik oqaatigineqartassaaq.

b) Pisuusaartitsinermi pisimasuvik issuarneqartassaaq. Eqqoriaasoqartillugu isummiussigallartoqartilluguluunnit, tamanna ersarissumik oqaatigineqanngikkuni allanneqarsimassaaq.

 

Eqqartuussutinik tusagassiuineq
Pinerluutinik avammut saqqummiussinermi, annertuumik qajassuussilluni oqaasertaliisoqartassaaq. Tusagassiutitigut KNR siumoortumik pisuutitsinnginnissaa pillugu pisuutinneqartunik eqqartuussivik aalajangiisittarnissaa pingaaruteqarpoq.

Matumani eqqartuussivimmi suliap naammassineqarnissaanut akornusiisinnaasunik avammut saqqummiussisoqartannginnissaa, KNR-imi atorfillit eqqummaariffigissavaat.

Suliassiissutini pillaatissartalinni tamani illersuisoq assigalugu politiit unnerluussisussaatitaasullu killiffissiuisimanersut KNR-ip eqqummaariffigissavaa.

Suliassiissut pillaatissartalik avammut saqqummiunneqarsimatillugu, suliap naammassineqarnera pillugu imaqarniliap saqqummiunneqarnissaa KNR-ip anguniassavaa. Matumani unnerluussut taamaatinneqarsimagaluarpalluunniit, pinngitsuutitsisoqaraluarpalluunniit eqqartuussivimmilu aalajangiisoqaraluarpaalluunniit suliap naammassineqarnera pillugu imaqarniliaq saqqummiunneqartassaaq.

 

Kinaassutsimik saqqummiineq

Nutaarsiassaq pingaassutsimikkut inuiaqatigiinnullu soqutiginaateqarpat, inuit annertuumik pinerluuteqarsimasutut unnerluutigineqartut aqqi avammut saqqummiunneqarsinnaapput.

Inuit pasineqarlutik unnerluussaanngitsut, tunngaviatigut aqqi avammut saqqummiunneqaqqusaanngillat. Pisortani atorfeqarlutik nuimasut pinerluuteqarsimasutut inatsisinillu unioqqutitsisimasutut pasineqartut, nalinginnaasumik aqqi avammut saqqummiunneqarsinnaasarput – pingaartumik inatsisinik unioqqutitsisimaneq pineqartup atorfianut tunngassuteqarsimappat.

Nutaarsiassaq pingaassutsimikkut inuiaqatigiinnullu soqutiginaateqarpat, unnerluussut eqqartuussutigineqareerpat pineqartup aqqa assialu avammut saqqummiunneqarsinnaanngortarput.

Eqqartuussivimmi sulianik saqqummiussinissami, kinaassutsimik avammut saqqummiussisoqannginnissaanik piumasaqaateqartoqarnersoq KNR-ip misissussallugu pisussaatitaavoq.

Immikkut ittumik pingaaruteqartinnagu, pineqaatissinneqartup inuiattut nagguia, najugaa upperisaaluunniit avammut saqqummiunneqaqqusaanngillat.