Naalakkersuisoq siunersiunermi isumaqataalersoq: Qaleralittassat qaffakkusulerai

Aalisarnermut naalakkersuiusup Uummannap eqqaani Qeqertarsuullu Tunuani qaleralittassat nungoreersut qaffanneqarnissaat naalakkersuisoqatiminut siunnersuutiginiarlugu ualimut siunersiuinermi oqarpoq.

Uummannap sulluani decembarimi pisassat novembarimut nuunneqarnissaat aamma misissorneqassaaq. Taakkua Naalakkersuisut sisamanngorpat aalajangissavaat.

Ataatsimiititaliaq qaffaanissamut aalisartullu aalisaleqqinnissaannut tapersiivoq.

Nalorninartorsiorfik

Qeqertarsuup Tunuani Uummannallu eqqaani sinerissamut qanittumi qaleralinniarneq maannakkorpiaq nalorninartorsiorfiuvoq. Aalisarfinnimi taakkunani maanna qaleralittassaqanngilaq.

Tassami Qeqertarsuup Tunuani ukiumut qaleralittassat nungoreerput, Uummannallu qanittuani novembari ilanngullugu pisassat aamma nungoreerlutik.

Kisianni aalisarnermut naalakkersuisup isummani aalisarnermut ataatsimiititaliamit ualimut siunersiorneqarnermini kimigiiserfigineqarami allanngorsimagaa erserpoq.

- Ataatsimiititaliami ilaasortat pisasseeqqissinnaanermut kaammattuuteqarnerat naalakkersuisunut apuukkumaarpara.

Aalisanermut naalakkersuisoq Jens Immanuelsen KNR-imut oqarpoq.

Akissutissaqanngitsoq

Uummaannap qanittuani qaleralittassat decembarimoortut qaammat una aalisarneqarnissaat, aalisartut peqatigiiffiata siunnersuutigisimavaa.

Tamannali akuerissanerlugu, naalakkersuisup KNR-imut akisinnaanngilaa.

Akuerigaluaruniullu aamma Uummannap qanittuani qaleralinniartut decembarimi pisasseqqissanerlugit, KNR-imut aamma akisinnaanagu.

Aalisarnermut, piniarnermut nunalerinermullu atatsimiititaliaq siunersiuinermi inernerusumut naammagisimaarinnippoq.

- Qeqertarsuup Tunuani Uummannamilu piaarnerpaamik umiatsiaararsortut aalisalernissaat ataatsimiititaliami ilaasortat amerlasuut kaammattuutigaat, aalisarnermut, piniarnermut nunalerinermullu atatsimiititaliap siulittaasua, Henrik Fleischer KNR-imut oqarpoq.