Randi Vestergaard Evaldsen politikkimit tunuartoq
Tusagassiuutinut marlunngornermi ullaakkut taama nalunaarpoq. Randi Vestergaard Evaldsen Inatsisartuni Kommunalbestyrelsimilu juulip ulluisa 31-anni naggataassaaq.
AAMMA ATUARUK Demokraatit suleqataajunnaarput
- Inuussutissarsiornermi unammilligasssamut akuersivunga, taannalu qinikkatut sulinermut atatinneqarsinnaanngilaq, tassalu naatsumik oqaatigalugu tunuarniarninnut tunngaviusoq, allappoq.
Randi Vestergaard Evaldsenip erseqqissarpaa aalajangernini politikkimik tunngaveqanngitsoq. Taarsiullugu ukiup affaata kingulliup ingerlanerani allamut alloriarusuttutut misigisimavunga taannalu politikkimit tunuarniarninnut peqqutaavoq.
- Tamanna unammilligassamik nutaamik kivitsinissannut kissaateqalersitsivoq, Randi Vestergaard Evaldsen oqarpoq.
Inatsisartunut 2014-imi qinigaaqqaarpoq aappaaguinnartorlu Naalakkersuisunut ilannguppoq aningaasaqarnermut aatsitassanullu naalakkersuisunngorluni. Atuuffik tanna ukioq ataaseq tigummivaa.
Randi Vestergaard Evaldsen Demokraatit siulittaasuattut februaari 2016-imi toqqarneqarpoq, taamatullu atuulluni 2018-imi upernaakkut Inatsisartunut qinersinerup kingornatigut Niels Thomsenimit taarserneqarnissani tikillugu.
- Partiimut siulittaasuuninni partiip aaqqissuussaanikkut allanngortiternera ingerlapparput, ilaatigut kingusinnerusukkut qinersinerni siuariarnitsinnik kinguneqartumik, qularinngilaralu qinersinerni kingullerni siuariarnerput ingerlaannassasoq, Randi Vestergaard Evaldsen oqarpoq.
Sermersuumi politikki inuulluaqqullugu
Randi Vestergaard Evaldsen aamma Kommuneqarfik Sermersuumi kommunalbestyrelsimut 2017-imi qinigassanngortippoq, Inatsisartunilu sulinermi saniatigut tassaniilluni – manna tikillugu.
AAMMA ATUARUK Niels Thomsen Inatsisartuni sulinerminit sulinngiffeqarallalerpoq
Kalaallit Nunaanni politikkimit tunuarnermini nuannersorpassuarnik qiimmattarnartunik eqqaamasaqarluni oqarpoq.
- Imminut unammillerlunga nuannareqaara, inuunermi periarfissaatitaasut akorusuttarpakka. Demokraatit tunuliaqutigalugit qinigassanngorteqqaarama taamaaliorpunga. Partiimut siulittaasunngoarama taamaaliorpunga. Naalakkersuisutut atuuffik tigugakkut taamaaliorpunga. Arlaannaalluunniit sekunti ataasiinnarluunniit peqqissimissutiginngilara.
Randi Vestergaard Evaldsenip aalajangernerata kinguneraa partiip ulluinnarni ingerlannera Nivi Olsenip siulittaasuugallartutut tigussagaa, siulittaasoq Niels Thomsen sulinngiffeqarmat.
Taamaanneranilu Inatsisartuni Simigaq Heilmann sinniisutut ukiamut aallartissaaq.
Kommuneqarfik Sermersuumi kommunalbestyrelsemi sinniisussaq Nadia Olsen Randi Vestergaard Evaldsenimut taartaassaaq.
