Qulaarpaa Nakorsat taarseraannerat naammaginanngitsoq
Nakorsat Narsami taarseraannerat pillugu Oline M. Gabrielsenip, 30-inik ukiullip, misigisai KNR-imi ataasinngormat oqaluttuaraagut. Nakorsallu taarseraannerujussuat napparsimasunut nalornisitsisoq nakorsaanerup Henrik Trykkerip oqaluttuaraa.
Kujataani peqqinnisaqarfimmi nakorsat pisortaat Anne Marie Buch KNR-ip oqaaseqartinniarsimagaluarpaa. Anne Marie Buchili maajip aallaqqaataani suliunnaarniarluni nalunaarpoq taamaasillunilu kujataani peqqinnissaqarfik nakorsat pisortaqarunnaarallaqqilluni. Anne Marie Buchillu peqqissutsimut pitsaaliuinermullu aqutsisoqarfimmi pisortaq Anne-Marie Ulrik innersuuppaa.
Aamma atuaruk Nakorsat taarseraannerat napparsimasunut nalornisitsinerulerpoq
Nakorsat pisortaat: Naammaginanngilluinnarpoq
Anne-Marie Ulrik nakorsat taarseraannerat pillugu apersortikkusussimanngilaq allakkatigullu KNR-imut ima allappoq:
- Maanna kujataani nakorsat pingasut atorfeqarput, siornatigut ikinnerusarsimapput kujataanilu nakorsaaneq kisimiilluni atorfeqartarsimalluni. Tamanna naammaginanngilaq kujataanili kisimi taamaanngilaq. Nakorsalli ikittuinnaat Qeqertarsuup tunuani Avannaanilu peqqinnissaqarfinni atorfeqartut Anne-Marie Ulrik allappoq.
Ilanngullugulu oqaatigaa tamanna nakorsiartartunut iluaagineqarsinnaasoq paasisinnaallugu.
Napparsimasut pillugit nalunaarsuiffiit elektroniskiusut isumannaarisussaapput
- Nakorsiartartut iluaagilluinnaraat paasilluarsinnaavara kisianni tassa pissutsit ajoraluartumik taamaapput, Anne-Marie Ulrik peqqissutsimut pitsaaliuinermullu aqutsisoqarfimmi pisortaq allappoq.
Taassuma taakkartorpai nakorsiartartut allattorsimaffii elektronskiusut, telemedicin tassa qarasaasiaq atorlugu nakorsiarneq, kalaallinik nunaqavissunik napparsimaveqarfimmi sulisoqarneq ukkatarineqarnerunissaa, tamakkuussasut nakorsat nikeraraluartulluunniit napparsimasut isumannaassusaannik qulakkeerinnittussat.