Piffissaq eqqorlugu akiliineq ajortut saamisaarfigineqassanngillat
Inissiani attartortut ineqarnermut, imermut kiassarnermulluunniit piffissaq eqqorlugu akiliisimanngitsut saamisaarfigineqarnerulissanngilat.
Atassutip siunnersuutigigaluarpaa, peqqussutit atuuttut qasukkarneqassasut inuit akiligassaminnik akilinngitsuugaqartut angerlarsimaffeeruttaqqunagit.
Ineqarnermut Naalakkersuisoq Kim Kielsen, Siumut siunnersuummut itigartitsilluni oqarpoq peqqussutinik qasukkaaneq pissusissamisuunngitsoq, akiligassat akilinngitsuukkat, ineqartut peqatigiiffiini attartortunut akiligassaminnik isumaginnilluartunut tuttarmata.
- Akiligassanik akiliinngitsoortartut A/S INI -ip oqilisaaffigisalissappagit aningaasanik atukkiinertut isigineqartussaavoq tamannalu attartornermut peqqussummik unioqqutitsinerussaaq, naalakkersuisunut ilaasortaq Kim Kielsen oqarpoq.
Attartortitsisup akiligassanik akiliinngitsoortut anisittartussaavai akiligassatigut attartortut allat artukkersorneqaqqunagit. Kim Kielsen erseqqissaavoq attartortunik immikkoortitsisoqaqqusaanngimmat siunnersuut itigartittariaqarsimagini. – Taamaakkaluarpalluunniilli kinaluunniit akiitsoqalersimasoq akilersuinissamut isumaqatigiissuteqarniarluni saaffiginnissinnaajuassaaq, Kim Kielsen oqarpoq.