IA misileeqqippoq: Palæstina akuerineqarli
IA-p Folketingimut ilaasortaatitaata Sara Olsvigip Enhedslisten peqatigalugu Palæstinap naalagaaffittut akuerineqartariaqarneranik Folketingi kimigiiserfigai.
- Folketingimut ilaasortatut, suliaq taama ittoq tapersersussallugu uannut tunngaviulluinnarpoq, nammineerlutami nammineq aalajangiinissamut pisinnaatitaanissaq namminiilivinnissarlu ilisimasaqarfigereerparput.
Enhedslisten peqatigalugu siorna assingusumik siunnersuuteqarpoq, naalakkersuisunillu taamani itigartinneqarluni, EU FN-ilu peqatigalugit ataatsimoortumik isummerfigineqarnissaa tunngavilersuutigineqarpoq. Palæstina kingorna naalagaaffittut alaatsinaattutut FN-imit akuerineqarpoq, tamannalu pissutigalugu partiit marluusut danskit naalakkersuisui kimigiiserfiginiarsareqqippaat.
- Matumani suliaq unitsinngisaannassavarput. Suliaavormi IA-p Folketingimi Enhedslistenillu pingaartittupilussuusaat, Sara Olsvig oqarpoq.
Palæstinap akuerineqarnissaa danskit naalakkersuisuisa naalakkersuisunngortitsinermi toqqammaviisa ilagigaluaraat, danskit nunanut allanut ministeriata Villy Søvndalip suliaq folketingimi marlunngormat suliarineqarmat itigartippaa. EU-mit ataatsimoorussamik aalajangiiffigineqarnissaa kissaatigineqartoq innersuussutigaa.
- FN-ip ataatsimeersuarnerani nalunaarutip taasissutigineqarnerani akuersinissamik aalajangernikkut naalakkersuisut Palæstina akuerinngilaat. Palæstinalli naalagaaffittut akuerineqarnissaanut politikkikkut pissutsit naleqquttut anguneqarnissaat EU-mi nunat allat qanimut suleqatigalugit pimoorullugu sulissutigissavarput, oqalugiartarfimmit taama oqarpoq.
Siunnersuutip siullermeerneqarnerata kingorna siunnersuut Nunanut allanut ataatsimiititaliamut suliassanngortillugu ingerlateqqinneqarpoq. Tamatuma peqatigisaanik Palæstinamik illersuiniaqatigiit 50-it Christiansborgip silataani akerliussutsimik takutitsipput.