Aalisakkap orsua peqqinnarneruvoq
Aalisakkap orsua, nakorsaatinut akisoqisunut sanilliullugu peqqinnarnerujussuusoq, misissuinerup nutaap uppernarsivaa. Uummalluttorpassuit aalisakkap orsutortartut nakorsaatinik akisoqisunik pisartunut sanilliullugit annaassimagai, aviisip MetroExpressip ullumi allaaseraa.
Skrevet af Louise M. Kleemann
04. september 2008 11:02
-Aalisakkap orsuata nakorsaat kolesterolimik appartitsisartoq ajugaaffigaa. Tassami orsoq Omega3 uummammut katsorsaatitsialaavoq, uummatip tillernera akuttoqatigiinnerusumik ingerlatilersinnaavaa, taamaalillunilu tassanngaannartumik uummatip unittoornissaralua pinngitsoortissinnaallugu, taama oqarpoq uummalluttarneq pillugu ilisimatooq, kiisalu Gentoftep napparsimaviani nakorsaanertut atorfilik, Steen Stender.
Misissuineq naapertorlugu nakorsaatit atugaasorujussuit kolesterolimik appartitsisartut uummallunnermut iluaqutaarpiarneq ajorsimapput, akerlianik aalisakkap orsuanik sanaanik iisartagartortarnerup inuit uummallunnermik peqquteqarlutik toqusartut 9 procentimik ikinnerulersippai.
