USA-p Kina Issittumit nigorsimaaqqullugu Kalaallit Nunaat pisiarerusussimagaluaraa
USA-p præsidentiata, Donald Trumpip, nunarput siorna aggustip qaammataani pisiarinialikkersaarnerarmagu uitsatigineqaqaaq.
Trumpip naalakkersuisuisut siulittaasuata, Kim Kielsenip (S), aamma peqataaffigisassaraluani, danskit ministeriunerannut Mette Frederiksenimut tikeraarnissamik pilersaarnerani tamanna pivoq.
Donald Trumpilli nunatsinnik pisinialikkersaarnini nalunaarutigereeraalu, Kielsenip nunarput tuniniagaannginnerarlugu tunineqarsinnaannginnerarpaa.
Taamalu pisoqarnerata malitsigisaanik Mette Frederiksenip tamanna isumaqanngilluinnararmagu USA-p Danmarkillu attaveqarnikkut ajalusuullatsiarnerannik kinguneqarpoq. Tamanna præsidentip tikeraarnissaraluaminik kinguartitsineranik kinguneqarpoq.
AAMMA ATUARUK Namminersorlutik Oqartussat: Niueqateqarusuppugut kisianni tuniniagaanngilagut
Nunatsinnilli pisiarinnikkumagaluarnera USA-p iliuusissatut pilersaarusiarsuanut ilaasimagaluartoq, præsidentip isumannaallisaanermut siunnersortigisimasaa John Bolton oqarpoq.
Taanna tuluit aviisiannit The Timesimit apersorneqarami taama oqartoq, danskit aviisiat Ekstra Bladet allappoq.
- Kinap Issittumi pissaanilissuanngorniarnerata ernummatigineqarnera tunngaviuvoq. Tamanna aarlerinaqaaq, John Bolton oqarpoq.
- Kinap taamaaliornera nunarsuarmi pissaanilissuanngorniarsarinerminut periuserisaata ilagaa. Kinap taamaaliornera nunanut allanut mikisunut akiitsorpassualinnut aningaasaliinikkut pissaanilissuanngorniarnertut taasarparput.
- Kina Manerassuarmi nunani assigiinngitsorpassuarni taamaaliortareerpoq, iliuusissatullu pilersaarusiaminut atatillugu nunarsuup ilaani pingaarutilimmik inissisimaffilinni soorlu Kalaallit Nunaanni aamma taamaaliorniarsarivoq, John Bolton The Timesimut oqarpoq.
Taamaammat Trumpip Kina Issittumit ajangisaarniarlugu Kalaallit Nunaat pisiarinialikkersaaraluarpaa. Bolton USA-p isumannaallisaarnermut pilersaarusiarsua pillugu taama oqarpoq.
Trump isumannaallisaanermut sivisunerpaamik siunnersortigisimasaata, John Boltonip, Trump qullersaralugu præsidentip illorsuani Det Hvide Husimi sulinermini misigisani pillugit atuakkiaa sapaatit akunneranni kingullermi saqqummerpoq.
