Trumpimut unnerluussutit ullumi taasissutigineqassasut
USA-p præsidentiata, Donald Trumpip, naalakkersuinermi akisussaasumut eqqartuussivimmut sassartinneqarnissaanut atatillugu unnerluussutit, Innuttaasut sinnerlugit sinniisoqarfimmi, tassa Repræsentanternes Husimi ilaasortat, ullumi taasissutigissavaat, akuersissutigineqassappatalu suliaq inatsisartut aappaannut Senatimut ingerlateqqinneqassallutik.
Demokratit Repræsentanternes Husimi siulittaasuat Nancy Pelosi, demokratit ilaasortaatitaasa ataatsimeereerneranni taama oqarpoq.
AAMMA ATUARUK USA-p præsidentia atuuffimminik atornerluisutut rigsrettimut sassartinneqartussanngortoq
Repræsentanternes Husimi ullumi pingasunngornermi taasinissaq, Trumpip rigsretimut sapaatip-akunnerata massuma ingerlanerani sassartinneqarsinnaanissaanut ammaassissaaq.
Trumpip rigsretimut sassartinneqarnissaanut unnerluussutit Senatimut ingerlateqqinneqarnissaat, Pelosip sapaatip-akunnerit arlallit utaqqisimavaa.
AAMMA ATUARUK Trumpip rigsrettimi pinngitsuutinneqarnissami ilimagigaa
Suliamut atatillugu ilisimannittunik allanik killisiuisoqarsinnaanersoq, Pelosip, republikanerillu Senatimi amerlanerussuteqartut siulittaasuata Mitch McConnellip akornanni isumaqatigiinngissutaavoq.
Præsidentip illussaarsuani Det Hvide Husimi maanna atorfilittat nuimasut, siornatigullu atorfilittaasimasut, suliamut atatillugu Senatimi nassuiaateqarnissaat, USA-mi demokratit kissaatigaat
Donald Trumpip naalagaaffimmi isumannaallisaanermut tunngasunut siunnersortigisimasaa, John Bolton, Trumpip eqqartuussivimmi ajorsaratarsinnaaneranut sunniuteqaqataasinnaasut ilagaat. Trumpip inuttaanut unnerluussutit eqqortuunnginnerarpai.