USA-p præsidentia atuuffimminik atornerluisutut rigsrettimut sassartinneqartussanngortoq
USA-mi Repræsentanternes Husip præsidentip, Donald Trumpip rigsrettimut sassartinneqarnissaa danskit nalunaaqutaat naapertorlugu sisamanngornerup unnuaani taasissutigaat.
USA-p oqaluttuarisaanerani aatsaat pingajussaanik taama pisoqarpoq.
Unnerluussut siulleq pissaanermik atornerluinermut tunngasoq Repræsentanternes Husip taasissutigaa, tassani Demokraatit amerlanerussuteqarput, tassa taasinermi 230-t akuersipput, 197-illu akerliullutik.
AAMMA ATUARUK Whistlebloweri: Præsident Trumpip pissaanini atornerluppaa
Unnerluussut taanna Donald Trumpip atuuffini atorlugu Ukrainimi naalakkersuisunut kimigiisersimavoq.
Tassa, Ukrainip Trumpip politikikkut akerarisaa Joe Biden taassumalu ernera peqquserluttutut misissuiffiginiaraa Ukrainimiut præsidentiata Volodimir Zelenskijip nalunaarutiginngippagut USA-p sakkutooqarnikkut tapersiinini tunuarsimaartinniarpaa.
Aamma unnerluussutip aappaani tassa Kongressip suliaanik akerliunermut tunngasumi Donald Trump rigsrettimut sassartinneqassaaq.
Tamanna danskit nalunaaqutaat naapertorlugu unnuaq pingasunngunngitsiartoq taasisoqarnerani erserpoq.
Tassanilu 229-t sassartitsinissamut taasipput 198-illu akerliullutik.
Unnerluussut taanna Kongressip naapertuilluarnermik suliaqarnissaanut Trumpip akornusersuineranut tunngavoq.
Trumpip Kongressip rigsretimik misissuinerani qaffasissumik atorfillik suliamut ilisimannittutut nassuiaateqarnissaat itigartitsissutigaa.
AAMMA ATUARUK Trumpip rigsretimut sassartinneqarsinnaanissaa eqqarsaatersuutigineqarpoq
Rigsrettimi suliaq Senaatimut maanna nassiunneqarpoq, tassanilu suliaq aalajangiiffigineqassalluni.
Trump tunuartinneqassaguni Senatimi ilaasortanit 100-init minnerpaamik 67-it isumaqataanissaat pisariaqarpoq.
Senaatimiittut affaat republikaneriummata taamaattoqassaguni republikanerit qassiiusut Donald Trump tunullugu taasinissaat pisariaqassaaq, tamatumalu pinissaa ilimanngilaq.
Repræsentanternes Husimi oqallinneq pingasunngornermi ullaakkut aallartinneqarpoq, taasinerlu siulleq unnukkut 20.30-p missaani naammassineqarluni.
