Trumpip rigsretimut sassartinneqarsinnaanissaa eqqarsaatersuutigineqarpoq
Donald Trumpip tunuartinneqarsinnaanissaa pillugu naalakkersuinermi eqqartuussivimmut sassartinneqarsinnaanersoq misissorneqassasoq, USA-mi Innuttaasut sinnerlugit sinniisoqarfimmi siulittaasup, tassa Repræsentanternes Husimi siulittaasup Nancy Pelosip, Demokratiusup, oqaatigaa.
- Præsidentip iliuuserisimasani akisussaaffigisariaqarpai. Inatsisit pioreersut qaangiataaginnarsinnaanngilai, Nancy Pelosi oqarpoq.
Trumpip Ukrainep præsidentianik Volodymyr Zelenskij-mik oqarasuaatitigut qanittukkut attaveqarnera apeqquserneqarpoq, Trumpillu tamanna pillugu rigsretimut sassartinneqarsinnaanissaa, USA-mi demokratit maanna misissornialerpaat.
USA-p præsidentimut tullersortigisimasaata Joe Bidenip misisssorneqarnissaa Trumpip Ukrainep præsidentianik oqaloqateqarnermini sukataarutigisimagaa, paasissutissanik isertortunik siammarterisup, whistleblowerip, præsidentip illorsuata Det Hvide Husimeersup, oqaatigaa.
Joe Biden USA-mi demokratit sinnerlugit præsidentimut aappaagu 2020-mi qinersisoqarnissaanut sassartunut ilaavoq.