Nive Nielsen Disneyp isiginnaagassiaani: - Assorujussuaq pissanganarpoq!
Disney. Willem Dafoe. Oqaluttuarlu piviusumik tunngavilik.
Isiginnaagassiaq pissanganartoq "Togo" juullinngitsiartoq decemberip 20-ani saqqummerpoq. Isiginnaagassiaq qimmimut qimuttumut Togomut tunngavoq. Qimmeq inuttani Leonhard Seppala peqatigalugu Alaskap illoqarfiisa ilaannut Nomemukarniarpoq. Tassami meeqqat napparsimasut inuunerminnik navianartorsiortut nakorsaatissaannik pajunniarpaat. Oqaluttuaq 1925-ikkunni pisimasuunikuuvoq.
- Nive Nielsen kalaaliuvoq erinarsortartoq isiginnaartitsisartorlu. Nive nipilersoqatigiinni "The Deer Children"-imi ilaavoq.
- Isiginnaagassiami qiiaamminartuliami "The Terror"-mi asanninnilersaarummilu "The New World"-imi aamma peqataanikuuvoq.
- Nielsen 2009-imi "Vox Pop Independent Music Award"-innappoq. 2012-imilu Kronprinsparrets Stjernedryspris-innalluni.
- Kiisalu Norgemi "Grammy Award"-imut innersuunneqarnikuulluni.
Inuk Atiqtalik
Aqqutaani silarlussuarmi Togop Seppalalu Atiqtalik naapippaat. Taanna Nive Nielsenimit inuttalerneqarpoq:
- Inuk arnaq indianerimut angummut katinnikoq, Nive Nielsen oqarpoq.
- Nuanneqaaq assorujussuaq pissanganarpoq. Aamma Willem Dafoe isiginnaartitsisartutut assut qangali torragisamma ilagigamikku. Taamaattumik assorujussuaq pissangavunga, isiginnaartitsisartoq nipilersortartorlu Nive Nielsen oqarpoq. Taanna isiginnaagassiortunit attavigineqarsimavoq.
- Attavigineqarpunga toqqaannartumik taakkunaninngaanniit misilitseqqullunga tassunga filmimut.
Imminut filmiliorpoq
Aaqqissuisummi Nive Nielsen isiginnaagassiami "The Terror"-mi takusimavaat. Isiginnaagassiaq Ridley Scottimit suliarineqartoq.
AAMMA ATUARUK Nive Nielsen Sir John Franklinilu pissanganartorsiortut
- Tuaviinnarsuaq misiliivunga nammineq imminut mobilikkut immiullunga Parisimi tusarnaartitsilerluta.
Isiginnaagassiat assigiinngitsut naggueqatigiinnit inunnit peqataaffigineqartalernerat Nive Nielsenip nuannaarutigalugu oqaatigaa:
AAMMA ATUARUK Nive nunani tamalaani nangeqattaartuliami angisuumi inuttaalersoq
- Alutornaqaaq massakkut aamma isiginnaagassiat filmillu assigiinngitsut inunnik inuttaqallattaasalernikuugamik taavalu massakkut pingaartinneqartupilussuulluni inuiannit allaninngaanniit "inuusaartoqassanngitsoq" taamaammat torragisupilusssuuara taamatut allanngoriartortoqarnera.
Isiginnaagassiaq Disneyp kanaliatigut takuneqarsinnaavoq, nunatsinnili Europamilu suli takuneqarsinnaanngilaq.
"Togo"-p Katuami takutinneqarnissaa suli pilersaarutaanngilaq.
Qilanaartuut uani takujuk: