Politiinit ullormut nalunaarusiaq: Taxat illumut aporput

Ippassaq arfininngornerup ullaavani, sisimiuni biilit taxat illumut aporput, nuummilu aqquserngup quasallisimanerani, aqqusinermi ajutoortut amerlapput.

Ippassaq arfininngornerup ullaavani, sisimiuni biilit taxat illumut aporput, nunatsinni Politiit pigaartuisa pisortaat, Carl Svær, taama KNR-imut paasissutissiivoq.

Ullaakkut nalunaaqutaq 06.13, biilinik ajutoorneq nalunaarutigineqarpoq.

- Ajutoorfiusumi politiit najuupput, imigassartorsimatillunilu ajutoorneq pisimanngitsoq paasineqarpoq. Ilimagineqarporli biilinik aquttoq, biilit ingerlaarnerini sinilersimassasoq, taamalillunilu illumut aporsimasoq.

- Ajutoortoqarnera massakkut misissuivigineqarpoq, nalilersorneqassaarlu biilinik aquttuusoq, aqqusinermi ingerlaartoqartillugu inatsisinik unioqqutitsisimanersoq,

Nunatsinni Politiit pigaartuisa pisortaat nagilluni paasissutissiivoq.

Illumi aporneqartumi najungaqartut, meeraq angullu ataaseq, ajutoornermi aqqunarsimanngillat.

Taxartitsisoq annertunerusumik aqqunarsimanngilaq, ilaasuusorlu annikitsuinarmik kimillattitersimavoq.

Aqqusinermi ingerlaartilluni ajutoortorpassuit

Arfininngornerup unnuaani sapaallu ilanngullugu, Nuummi aqqusinermi angallannermi amerlasuunik ajutoortoqaqattaarpoq, tamannalu peqquteqarpoq aqquserngup, aputip aassimasup qerineranik quasallisimammat.

Biilit amerlasuut kussinermut nakkarsimapput, pisorlu aquttup biilit aqussinnaajunnaarnerisa kinguneranik, aqqusinermi siviganikkut biilinik sisoorsimavoq.

Ajutoortoqarnerani pisuinnartoq aporneqarpoq, aporneqartorli annertunerusumik aqqunarsimanngilaq, Carl Svær paasissutissiivoq.

Aqqusinermilu angallannermut atatillugu ajutoortoqarnerani, tingummigallagassanngortoqarnilu tingusarinnittoqanngilaq.