Timersortarfissuup tusaamaneqarluartut soqutiginnilersissinnaagai
Nuuk siunissami tusarnaartitsinermi 10.000-it tikillugit isersimaffigineqarsinnaasumik timersortarfissuartaassappat, tusaamaneqarluartut soqutiginnilersinniarnissaat ajornannginnerulissaaq. Nuummi tusarnaartitsinissanik aaqqissuisuusartut taama isumaqarput, taamaammat timersortarfissualiorniarneq taperserpaat.
- Tamanna periarfissaqartitsillualissaaq, Nuuk TV-p raadioani Nanoq FM-imeersoq, Claus Nissen oqarpoq.
Taakku danskit nipilersortartuat Lukas Graham Nuummi timersortarfimmi Inussivimmi juunip naanerani tusarnaartitsisussanngortippaat.
AAMMA ATUARUK Lukas Graham Nuummi tusarnaartitsilersoq
Tusaamaneqarnerusut soqutiginnilersinnaasut
Claus Nissen naapertorlugu timersortarfissuaq piviusunngortinneqarpat nunarsuarmi tusaamasat suli tusaamaneqarnerusut tusarnaartitsiartornissaminnut soqutiginninnerulissapput.
- Tusarnaartitsiffissami amerlanerusunik inoqartitsisinnaassagutta soqutiginarnerulersinnaanissaa neriuutigaarput. Taamaammat soqutiginartorujussuusoraara, Claus Nissen oqarpoq.
Timersortarfissuaq Kommuneqarfik Sermersuup illoqarfissuarmut pilersaarusiarsuata ilaa illoqarfiup ilaanik nutaamik 5000-inut inissaqartitsiffiusussamik, atuarfinnik paaqqinniffinnillu sanaartornissap ilagaa.
Aningaasalerneqarnissaali suli piareerneqanngilaq.
Nuummiuunnaanngitsunut
Naak Nuummi innuttaasut 17.000-iinnaagaluartut illoqarfiit pingaarnersaata timersortarfissuassaa 10.000-it tungaanut isersimaffigineqarsinnaassaaq. Taamaakkaluartorli anguniagaq qaangerlugu pilersaarusiortoqanngitsoq, Claus Nissen isumaqarpoq.
Aasamummi Lukas Grahamip tusarnaartitsinissaanut isissutissarsisut Nuumminngaanneersuinnaanngitsut taakku nalaappaat.
- Taamaammat isumaqarpunga sineriammiit inunnik soqutiginnilersitsisinnaasassasugut aammattaaq nunani tullerisatsinniit Islandimiit Danmarkiminngaanniillu soqutiginnittoqarsinnaassasoraara, Claus Nissen oqarpoq.