Siumut: Tamat tutsaanni oqqanneq unitsissiuk

Siumumi ilaasortat nuimasut, Lars-Emil Johansen Kim Kielsenilu, aaqqiagiinngillat.
Partiillu siulittaasua, Naalakkersuisut siulittaasuat Kim Kielsen, KNR-imut tallimanngormat oqarpoq aaqqiagiinnerulernissartik pillugu suli iliuuseqarani: 

- Tusagassiutitigut allaffigivaanga aamma tusagassiutitigut allaffigivara. Ippassaq issiaqatigiippugut, oqariartortoqanngilarluunniit tusagassiutinut taamatut saqqummiiniarluni.

Inatsisartunit ilaasortanit Siumumeersunit assortuuneq maluginiarneqanngitsuunngilaq.

- Taamatut killittoqarnera avaanngugivara assorujussuaq. Tassami illumi ataatsimi allaffeqarput, taamaammat igalaakkut imminnut ersiinnartumi issiaveqarlutik. Pingaartorujussuarnik akisussaaffinnik tamarmik tigummiaqarput, Inatsisartunut ilaasortaq Siumumeersoq Jess Svane oqarpoq.

Taassuma illua tungeriik ingillutik oqaloqatigiinnissaat kissaatigaa:

- Aamma taanna unneqqarissaarneruvoq. Imminut tunulluni oqatsiallattaaginnarneq tassaasarpoq unneqqaserlunneq.

Siumup gruppiani siulittaasup, Jens Immanuelsenip, imminnut qaninneruleqqullugit gruppimi naapinnissaq naatsorsuutigaa:

- Inuiaqatigiit eqqarsaatigalugit soorunami taanna ajuusaarnarpoq, neriuppunga tamatta ilinniarfigissagipput, Jens Immanuelsen oqarpoq. 

Inatsisartuni ilaasortaq Anders Olsen, aaqqiagiinnginneq pillugu annerusumik oqaaseqarumanngilaq, taassumali Siumup gruppiani aaqqiagiinginneq qulequtaralugu ulluni qaninnerpaani ataatsimiinnissaq uppernarsarpaa.