Suliffimmi isumannaallisaanikkut pissutsit Folketingimi Inatsisartunilu oqallisigileraat

Christiansborgimi qinikkat aalajangigassaat tassaavoq Kalaallit Nunaanni suliffimmi isumannaallisaanikkut pissutsit allanngortinneqassanersut.

Allannguinermi suliffeqarfiit Kalaallit Nunaanni aatsitassarsiorsinnaatitaasut erngullu nukinganik atuisussat naalagaaffiup sullivinnik nakkutilliisuisa takusaaneri namminneq akilertalissagaat pineqarput.

Aatsitassarsioqatigiiffinnimi erngullu nukiliorfissaanik suliaqartunut takuniaasarnerit Kalaallit Nunaanni avinngarusimasumiikkajupput takuniarnerilu akitsupallassinnaaqalutik.

Maanili Nunatsinni alloriarneq anginerusoq tiguneqassaaq. Inatsisartummi aalajangissavaat suliffimmi isumannaallisaanikkut pissutsit pillugit oqartussaaffik tigussanerlugu.

Namminersorlutik Oqartussat taanna oqartussaaffigilissappassuk kalaallit suliffimmi isumannaallisaanikkut pissusaat aallaaviussapput.

Suliffeqarnermut nukissiuuteqarnermullu naalakkersuisuusimasup Vittus Qujaukitsup uparuarsimavaa namminersortunngoriartorneq eqqarsaatigalugu pissusissamisoortoq Kalaallit Nunaanni suliffimmi isumannaallisaanikkut malittarisassat naleqqussarneqarpata.

Tassani aatsitassarsiornissamut suliniutit eqqarsaatigalugit sulisussat amerlasuut nunani allamiut aamma pisariaqartinneqartarmata.

Allannguutaasinnaasulli eqqarsaatigalugit Folketingip Inatsisartut aalajangernissaat utaqqeqqaanngimmagu pissutaavoq Danmarkip oqartussaanerata nalaani sammineqartup ingerlajuaannarnissaa, Vittus Qujaukitsoq KNR-imut taama allappoq.
--
Sulisitsisut peqatigiiffiat isumaqarpoq Kalaallit Nunaat piareersimanngitsoq suliffimmi isumannaallisaanikkut pissutsit oqartussaaffigilissallugit.

Siunnersuulli amerlanerussuteqartunik taperserneqartussatut isikkoqarpoq. Atassaut Demokraatillu kisimik akerliupput.