Illuatungiliuttut: Sullivinni avatangiisinut suliassaqarfiup tiguneqarnissaa akisuallaarpoq

Nunarput namminiilivikkiartormat nunami sullivinni avatangiisinut tunngasup Namminersorlutik Oqartussanit tiguneqarnissaa isumassarsiatsialaavoq.

Aalajangiiffigisassatut siunnersuut Inatsisartunit tallimanngormat siullermeerlugu oqaluuserineqarmat, Siumumit, Inuit Ataqatigiinnit Partii Naleqqamiillu taama oqartoqarpoq.

Aningaasanulli inatsisip amigartooruteqarfiunera, aningaasallu ataasiaannarlutik atorneqarsinnaasut Atassutip Demokraatillu uparuarpaat, tamannalu pissutigalugu siunnersuut ataatsimoorussamik oqaaseqaateqaamminni pisariaqannginnerarlugu.

AAMMA ATUARUK Demokraatit Naalakkersuisut tapersinngikkaat

Nunami sullivinni avatangiisinut tunngasumut akisussaaffiup Nunatsinnit tiguneqarnissaa 10 millionit koruuningajannik akeqassaaq. Taakku Danmarkimit ullumikkut akilerneqartarput, akisussaaffilli tigussagutsigu uagut akilertalissavarput.

- Demokraatini Atassummilu 10 millioner koruuninik atuiffiusinnaasunik nassaarsinnaakutsoorpugut, partiit illuatungiliuttut ataatsimoorussamik oqaaseqaamminni oqarput.

Akisussaaffiup taassuma tiguneqarnissaa sooq silatusaarnerunersoq partiit naalakkersuisuutitaqartut oqaaseqaamminni erseqqissaatiginngilaat, suliassaqarfinnilli tigusinissaq namminiilivikkiartortoqarnerani pissusissamisoorajuttartoq tunngavilersuutigalugu.

AAMMA ATUARUK SIK: Suliffeqarfiit avatangiisiisa pitsaasuunissat nukissaqartinngilarput