Sulisoqarneq upernaakkut ataatsimiinnermi qitiussaaq
inatsisartut ukiakkut ataatsimiinnerat sisamanngorpat allartissaaq. Naalakkersuisut inatsisissatut siunnersuutaat arlallit, suliffeqarnermut tunngasut, politikerit suliarissavaat.
Inatsisartut nunami sullivinni avatangiisinut akisussaasuulernissamik siunnersuut ataatsimiinnerup ulluisa aappariliinnaraat isummerfigissavaat. Suliassaqarfik Danmarkimi Sullivinnik Nakkutilliisoqarfimmit maannamut isumagineqartuugaluarpoq, Namminersornerlu pillugu inatsit naapertorlugu qallunaat naalakkersuisui Folketingilu isumaqatiginiareerlugit Nunatta tigusinnaasaannut ilaalluni.
Suliassaqarfik nunatta 2018-imi akisussaaffigilisavaa
Suliassaqarfimmik akisussaasuulernermi aningaasartuutit ukiumut 9,2 millionit koruuniussangatinneqarput, tigusinerlu siunnersuut naapertorlugu pissaaq, Namminersorlutik Oqartussat Sullivinnik nakkutilliisoqarfiup Nuummi sulisuinik sulisorinnilerneratigut.
Tassani sulisut pilersaarut naapertorlugu aqutsisoqarfimmi nutaami Sullivinnik Nakkutilliisoqarfimmik atilimmi sulisuulissapput, Naalakkersuisullu suliassaqarfimmik juulip aallaqqaataani 2018 tigusissallutik naatsorsuutigaat.
Suliassaqarfilli tigussagaanni sullivinni avatangiisit pillugit inatsimmik nutaarluinnarmik aalajangiinissaq pisariaqarpoq.
Tamanna pippat 2010-miilli aatsaat taama pisoqaqqissaaq. Aatsitassanut oqartussaaneq imartanilu sullivinni avatangiisinut oqartussaaneq 2010-imi akisussaaffigineqalerput.
Sungiusaammik sulineq pillugu inatsisissap pisortat sullivii pisussaffilerpai
Inuussutissarsiutinut, suliffeqarnermut, niuernermut nukissiutinullu naalakkersuisoq, Vittus Qujaukitsoq, suliffeqarneq pillugu allamik aamma oqallissutaasumik upernaakkut ataatsimiinnissamut siunnersuuteqarpoq.
Tassa inatsisissaq ilinniartitaanermi sungiusaammik suliffissaaleqisoqartarneranik iluarsiissutaasussaq. Siunnersuut 2016-imi aasakkut tusarniaassutigineqarmat sulisoqarnermi susassaqartunit isornartorsiorneqaqaaq.
Siunnersuut tamatuma kingorna naqqissorneqarpoq, pisortat suliffeqarfiutaasa amerlanerusunik sungiusaammik sulisoqartarnissaannik pisussaaffiliisunngorluni, suliffeqarfinnillu namminersortunik amerlanerusunik ilinniartitsinissamik aningaasaqarnikkut kaammattuisunngorluni.
2022-mi 400-nik amerlanerusunik sungiusaammik suliffissaqalernissaq siunertaavoq.
