Siunnersuisoqatigiit tunitsivinni kapisileqaleqqinnissaanik kissaateqarput

- Taanna imaqarpoq, kissaatigalugu taanna tunisisinnaaneq ammaanneqartariaqartoq. Naak annertunginarsinnaanngikkaluartoq, tamaasa qiviaraanni, kisianni pingaaruteqartutut isigigatsigu, kalaallit nioqqutissiaannik Kalaallit Nunaata iluani siaruarterisinnaaneq pingaaruteqarluinnarmat, Bent Sørensen oqarpoq, ilanngullugulu ersersinniarlugu, aalisartut pisaminnik tunitsivinnut tunioraanerisigut Nunatsinni immitsinnut pilersorsinnaanerulertartugut.

Naalakkersuisullu tamanna anguniagarimmassuk, tunisisinnaanermik unitsitsinerat siunnersuisoqatigiit apeqquserpaat.

Kapisillit tunitsivinnut tunisaasinnaajunnaarneranut Naalakkersuisunit suna tunngavigineqarnersut nalornissutigineqarpoq.

Aamma atuaruk Jørgen Isak Olsen: Naalakkersuisut suna tunngavigineraat nalunarpoq

Bent Sørensen oqaluttuarpoq kapisilittassiissutit 45 tonsiinnaaneri tunisassiorfinnut tunisisinnaannginnermut Naalakkersuisut Aalisarneq Pillugu Siunnersuisoqatigiinnut tunngavilersuutigisimagaat.

Taamali tunngavilersuuteqarneq Siunersuisoqatigiit paasiuminaatsippaat.

- Tamannalu tunngavigalugu tupaallaatigigatsigu, tassami ukiout siulii qiviaraanni massakkut pisassat appasinnerummata. Taava kisianni tunineqartussanngooq annikimmata, annikinneri taakku tunngavilersuutigineqartut, taanna oqaasiinnakkut tusallatsiaannarparput. Taamaammat Aalisarnermut Siunnersuisoqatigiit Naalakkersuisoqarfimmut allagaqarnikuupput, Aalisarnermut Siunnersuisoqatigiit siulittaasuat, Bent Sørensen taama oqarpoq.

Radioaviisip aalisarnermut naalakkersuisoq, Karl-Kristiansen  oqaaseqartinniaraluarpaa, iluatsinnaguli.