Jørgen Isak Olsen: Naalakkersuisut suna tunngavigineraat nalunarpoq

Aalisartut kapisilittaminnik tunitsivinni tunisisinnaajunnaarnissaannik KNAPK qulaatiinnarlugu Naalakkersuisut aalajangernerangaasut, Rasioaviisip ippassaq oqaluttuaraa. Taamatullu aalajangerneq KNAPK-mit isornartorsiorneqarpoq.
aggustip 27-at 2015 13:21

- Piffissaq kingullerpaaq tikillugu KNAPK sumiluunniit paasitinneqanngilaq qanoq aalajangilersaarnermik, KNAPK-mi siulittaasoq Henrik Sandgreen siornatigut oqarpoq.

Naalakkersuisullu aalajangernerminni suna tunngavigineraat suli nalunarpoq. Tassami Naalakkersusiunit suna tunngavigineqartoq, aalisarnermut naalakkersuisoqarfiup aamma ilisimanngilaa.

- Taamatut aalajangernerminni uanga ilisimanngilara suna tunngavigineraat, aalisarnermut naalakkersuisoqarfimmi pisortaq, Jørgen Isak Olsen KNR-imut oqarpoq.

Aamma atuaruk KNAPK: Tunisassiorfinnut kapisilinnik tuniseqqusaannginneq akuersaarsinnaanngilarput

Aalisartulli kapisilittaminnik tunitsivinnut tunisisinnaajunnaarsimanerannik aalajangerneq KNAPK-p ilisimasussaagaluaraa, Jørgen Isak Olsen aamma oqarpoq.

Naalakkersuisoqarfiummi e-mailinik nassiussileraangat, KNAPK tigusisussatut ilaajuaannartoq, pisortap oqaluttaraa.

Naalakkersuisut aalajangernertik allanngortissagaluarpassuk, Royal Greenland kapisilinnik nunatsinni tuniniagassanik 10 tonsinik pisinissaminut piareeqqalluni ippassaq nalunaarpoq.

Naalakkersuisulli aalajangiinerminnik allannguissanersut, Jørgen Isak Olsenip ilisimannginnamiuk, tamanna periarfissaanersoq akisinnaanngilaa.