GBU: Siuariarneq pitsaanerusinnaanngilaq

Nunatsinni isikkammik arsaanerup iluani Nunani tamalaani arsaattartut kattuffianit FIFA-mit akuerisamik Nuummi ivigaasanik arsaattarfeqalerneq Nunarpullu futsalimi unammiuaarnermi Nordic Cup-imi siullerpaamik peqaanera 2016-imi malunnaateqartuupput.

- Nunatsinni pissartanngorniuunnerit arsaattarfimmi ujaraaraasuni ingerlateqqissanngilagut, Nuummi aasaq 2016-imi ivigaaqqani siullermeertumik Nunatsinni pissartanngorniuuttoqareersoq GBU-mi siulittaasoq, John Thorsen oqarpoq.

Kommuneqarfik Sermersuup Nunatsinni arsaattarneq 2016-imi piorsaavigilluarpaa. Kommunip ivigaaqqanik arsaattarfik Nuummiittoq kommunillu iluani mikinerusunik arfinillit pilersitsineq aningaasaliiffigai. 

Taamaalilluni ivigaasani pujoralanngitsumi arsallu sumut tamaanga tammittaqattaarfiginngisaani Nunatsinni 2016-imi pissartanngorniuuttoqarpoq.

- Arsarneq allaanerusorujussuaq takuarput. Sukkassutsikkut, arsalerillaqqinnerunikkut arsariaatsikkullu. Nunatsinni ujaraaqqani pissartanngorniuuteqqinngisaannassaagut, John Thorsen KNR-imut oqarpoq.

Thorsen naapertorlugu, kommunit tamarmik ivigaaqqani siunissami arsaattarfittaarnissartik aalajanngersimavaat.

- Silami arsaattarneq siuariartorpoq, GBU-mi siulittaasoq oqarpoq.

Silami arsaanneq kisimi siuariartunngilaq.

Nunatsinni futsalimik unammisartut Nuummi Danmarkimut 2015-imi ajugaammata Nunatta arsaattartui imminut tatiginerulerput minnerunngitsumillu maluginiarneqarnerulerlunik.

Sverigemi decembarimi Nordic Cup 2016-eqarnissaanut GBU-p peqataatitsinissamik qinnuteqarneranik unammeqataatitsineranillu tamanna kinguneqarpoq.

Unamminerni Nunatta Danmark, Sverige, Finland Norgelu unammivai. Taasallu kingulliup unamminerani Nunarput 4-3-mik ajugaavoq Nunarpullu misilittagaqanngimmat tamanna angusarissaarnerujussuuvoq.

Kalaallit takutitsilluarnerata Kroatiami unammiuaarnermut qaaqqusaanermik kinguneqarpoq. GBU-lli aningaasaqarneq peqqutigalugu qaaqqusaaneq naggaartariaqarsimavaa.

GBU nunap ilaanut, Nunatta kujataanut, Qeqertarsuup tunuanut Nunattalu avannaanut sungiusaajartortalerpoq. GBU-p nunap ilaani sungiusaasussanik ilinniartitsivoq Nunatsinnilu arsaannerup piorsarneranut ilaalluni.

Siunertaq imaappoq, klubbit arsallaqqinnertatik nunap ilaani sungiusaasunut innersuuttassavaat taakkulu arsallaqqinnerpaanik nunanut allanut unammisartut sungiusaasuanut innersuussisassapput.

Nunap ilaani sungiusaaneq Nuummi ingerlalluarpoq, nunalli sinnerani suli nukittorsarneqartariaqartoq, GBU-mi siulittaasoq oqarpoq.

Saniatigullu nunap ilaani sungiusaasussanik Futsalimik ilinniartitsisussanik ilinniartitsisoqarpoq. Taakkulu nunap ilaani Avannaani Diskomi, Qeqqa 1-imi, Qeqqa 2-mi, kujataanilu agguataarneqarput. Tunu Qeqqa 2-mut atavoq. 

Tamaat isigalugu kalaallit arsaattarneranni siuariartornerit GBU-p pisortaata John Thorsenip nuannaarutigalugulu ilorrisimaarutigaa.

- Piviusumik isigalugu siuariartorneq pitsaanerusinnaanngilaq, Thorsen naammagisimaarinnilluni oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!