Timersorneq

Futsalimi pissartanngorniunneq: Semifinalet pissanganassagunaqaat

Angutit inersimasut futsalimi pissartanngorniunneranni Maniitsumi pisumi iligiit Nuummeersut pingasut aamma Nagdlúnguak Ilulissaniit semifinalemut anngupput.

Allattoq Noah Mølgaard

apriilip 18-at 2024 15:24

Angutit inersimasut futsalimi pissartanngorniunneranni Maniitsup timersortarfiani ulikkaaveqqasumi unamminnerit aallarniutaasut pingasunngornermi naammassipput.

Ulloq taanna unamminerit pissanganarluarput kikkut semifinalemut anngunnissaat unammissutigineqarmat.

- Iligiit taakku sisamat semifinalemut annguttut unammersuarnerni ingerlalluarnissaat ilimagikannereersimavarput, aaqqissuisuni Aqissiami siulittaasoq Per Andersen KNR-imut oqarpoq.

B-67 Nuummeersoq aamma Nagdlúnguak Ilulissaneersoq tallimanngornermi semifinalemi siullermi unammissapput semifinalellu aappaani Nuummeersut IT-79 aamma Young Guns Futsal unammissallutik.

- Iligiit taakku timikkut nukittupput unammersuarnermilu angusaqarniaraanni avaqqunneqarsinnaanngitsumik piareersarluarsimallutik. Taamaattumik inissaminiiginnarpoq iligiit taakku ingerlaqqimmata, Per Andersen oqarpoq.

Suli nalunartoqarpoq

Semifinalet tallimanngornermi nalunaaqutaq arfinermut aallartippata Nagdlúnguak aamma B-67 unammissapput taakkulu piareerpata IT-79 aamma Young Guns Futsal sassarumaarlutik.

- Soorunami siumungaaq oqaatigisinnaanngilarput kikkut finalemut anngutissanersoq, Per Andersen mianersortumik oqaaseqarpoq.

- Semifinalemi unammisussat imminnut nukittuffitsigut sanngiiffitsigullu ilisimalluarput. Taamaattumik unammineq taanna taktikkimut tunngangaatsiarumaarpoq.

- Nagdlúnguak aamma B-67 imminnut unammisareerput taamaattumik qanoq pisoqarnissaa siumut oqaatigiuminaappoq. Pissanganassagunaqaarli, Per Andersen oqarpoq.

Futsalimi pissartanngorniunnermi angusat unamminerillu tulliuttut

Angusat
B-67 - SAK: 19-4
N-85 - Young Guns Futsal: 2-5
Aqissiaq - Nagdlúnguak: 3-4
I-69 - IT-79: 3-14

B-67 - N-85: 21-0
SAK - Young Guns Futsal: 1-6
Aqissiaq - I-69: 7-5
Nagdlúnguak - IT-79: 3-4

B-67 - Young Guns Futsal: 4-3
SAK - N-85: 6-4
Aqissiaq - IT-79: 1-1
Nagdlúnguak - I-69: 10-2

Unamminerit tulliuttut

Tallimanngorneq 19. april
Nal. 14.00 SAK - I-69 (ingerlaqqinnissamut unammineq)
Nal. 16.00 Aqissiaq - N-85 (ingerlaqqinnissamut unammineq)
Nal. 18.00 B-67 - Nagdlúnguak (semifinale)
Nal. 20.00 IT-79 - Young Guns Futsal (semifinale)

Arfininngorneq 20. april
Nal. 11.00 Normu 7-nngorniunneq
Nal. 13.00 Normu 5-nngorniunneq
Nal. 15.00 Bronzennanniunneq
Nal. 17.00 Finale

Semifinalet KNR-TV-mi tallimanngornermi nalunaaqutaq arfinermut isiginnaarneqarsinnaapput.