Sisimiormiut oqaluttuatoqqat aallaavigalugit filmiliorniarput
-Inuit oqaluttuaatitoqaasa inummiit inummut oqaluttuarineqartarneri ullutsinni atugaajunnaavissortutut oqaatigineqarsinnaavoq. Tamannalu uangut aallarteqqeriassavarput.
Napa Sandgreen aamma Stefen Ringsø Nielsen ilinniarfimminni, Arktisk Ingeniørinngorniarfimmi Sisimiuniittumi naapinnermi kingorna taama pielersaaruteqalerput. Tamannalu filmiliornikkut pissasoq isumaqatigiissutigalugu.
Taama pilersaarusioreerlutik napippaat assiliisartoq, Inuuteq Storch. Tassalu filmilornissamik isuma aallartillugu.
Stefen Ringsø Nielsenip oqaluttuaraa, filmiliornerminni qamuteralannik nuannarisaqartut aamma sisorarnermik nuannarisartut, Inuit oqaluttuaatitoqaannik 'Qaammatip Inuianik' oqaluttuatoqqap inuttaanik naapitsinerat filmiliariniarlugu.
- Nunat allamiut sisorarneq pillugu Nunatsinni filmiliortartut nuannarinerusarpaat apummi qaallorissumi attorneqarsimanngitsumilu sisorartut filmiliarineqarnissaat. Tamannalu Kalaallit Nunatta takusassiarineqarneranut Inuillu oqaluttuatoqqaannut attuumassuteqanngillat, Steffen Ringsø Nielsen oqarpoq imalu nangilluni.
- Filmiliornitsinni nutaaliorniarpugut tassani inuit ataasiakkaat peqataatinnerunerini Nunatsinni pissutsit qanimut oqaluttuareriassallutigit, Steffen Ringsø Nielsen oqarpoq.
Taassuma ilanngullugu oqaluttuaraa, ullutsinni pissutsit qangalu pissutsit ilimagisamit assigiimmik suli oqaluttuarineqarsinnaalluartut, tassami oqaluttuatoqqani sapiitsuliortarnerit sisoraatinillu sapiitsuliortarnerit assigiinngissuseqagaanngimmata.
- Qanga oqaluttuatoqqat ullutsinni atorsinnaalluarpagut assersuutigalugu 'Qaammatip Inuianik' oqaluttuatoqaq angalanermut sapiitsuliornermullu tunngasuteqartuartoq sisoraatit atorlugit misigisassarsiornermut assersuunneqarsinnaalluarmata soorluttaaq snowboarderluni sisorarneq qimussernermut aamma assersuunneqarsinnaalluartoq.
Assiliisartoq Inuuteq Storch oqarpoq. Taassuma ilanngullugu aamma oqaluttuaraa, Sisimiormiut piumassutsiminnik suleqataasut peqatigalugit filmiliornerit qaammat kingullerli aallartereermata.
