Silap pissusia pillugu ataatsimeersuarnermi suliniutit nutaat aallartisarneqartut
Silap pissusiata allanngoriartornerata akiorneqarnissaa ataatsimeersuarnermi qulequtarineqarpoq. Politikerit, avatangiiseq pillugu suliniaqatigiiffiit atorfilittallu nunarsuarmit tamarmeersut peqataapput.
Ataatsimeersuarneq aallartinngitsiartoq ataatsimeersuarfissap silataani akerliussutsimik takutitsisoqartoq KNR-ip aallartitaa oqaluttuarpoq.
- Ataatsimeersuarfissatsinnut apuulluta inuppassuit akerliussutsimik takutitsisut naapippagut. Inuit 500-t missaat peqataapput, taakku pinngortitaq pillugu suliniutit naammaginagit arriippallaarnerarlugillu akerliussutsimik takutitsillutik, KNR-ip peqataatitaa Malu Pedersen oqarpoq.
AAMMA ATUARUK Tuskip silap pissusiata allanngoriartorneranut isiginninnera Nunatta sakkortusivaa
Silap pissusiata allanngoriartornera iliuuseqarfiniarneqarpoq
Ataatsimeersuarnermi septembarip 12-nit 14-anut ingerlanneqartumi gassinik kiannerulersitsisartunik aniatitsineq annikillinissaanut suliniutit assigiinngitsut saqqummiunneqarput.
Aamaruutissanik atuinerup annikillisinnissaanik peqatigiiffik siunertaqartoq nunanit tamalaanit, naalagaaffinnit, illoqarfinnit sumiiffinnillu assigiinngitsunit ilaasortaaffigineqarpoq. Taakku 2030-p tungaanut aamaruutissap atorunnaariartornissaa siunniuppaat. Ataatsimeersuarnerullu naammassinerani qulinik nutaanik ilaasortaqalerput, ilaatigut New York Los Angelesilu peqatigiiffimmut ilanngullutik.
Ataatsimeersuarnermi nuimasunik aamma oqalugiartoqarpoq, soorlu USA-p præsidentiata tullersortigisimasaa Al Gore, Repræsentant Hus-imiit Nancy Pelosi, Københavnillu borgmesteriunera Frank Jensen. Frank Jensenip aappaagu silap pissusia pillugu ataatsimeersuartoqaqqilerpat Københavnimi ingerlanneqarnera aaqqissuuttussaavaa.
AAMMA ATUARUK Vittus: Silap pissusia pillugu isumaqatigiissut Nunatsinnut pitsaasuunngilaq
Indiana Jones oqalugiarpoq
Tusaamasarsuit ilaat aamma oqalugiarsimasoq Malu Pedersenip oqaluttuaraa.
- Filmiliaritittartoq Harrison Ford oqalugiarpoq, qinersisartut kaammattorlugit tulliani qinersilerunik silap pissuasiata allanngoriartorneranut upperinnittumik qinerseqqullugit. Taava aamma kaammattuivoq avatangiiserput sissueqqullugu kiisalu aamma nunap inoqqaavisa ilisimasaat atorluarneqarlutillu tusarnaarluarneqassasut, taakkuummata silap pissusiata allanngoriartorneranit eqqungaanerpaasut, Malu Pedersenip filmiliaritittartup ilaatigut Indiana Jonesitut ilisarisimaneqartup oqalugiarnerani najuuttup taama oqaluttuaraa.
AAMMA ATUARUK Naalagaaffiit tamalaat silap pissusia pillugu atsioqatigiipput
Trump isornartorsioraat
USA-p præsidenterisimasaa Barack Obama videokkut aamma oqalugiarpoq, taassuma ataatsimut iliuuseqartoqarnissaa kaammattuutigalugu.
- Uagut massakkut maani nunarsuarmiittugut silap pissusiata allanngoriartornera siulliulluta kingunera annertuumik malugivarput. Taavalu uaguusariaqarpoq allannguisussat, Barack Obamap oqariartuutai Malu Pedersenip taama oqaatigai.
AAMMA ATUARUK G7-kkut Parisimi isumaqatigiissut pillugu isumaqatigiinngitsut
USA-mi præsidentitut 2004-mi qineqqusaarnikoq John Kerry aamma peqataavoq. Taassuma præsidenti Donald Trumpi Parisimi isumaqatigiissummit anisimanera isornartorsiorpaa. Isumaqatigiissut silap kissakkiartorneranut gradinik marluk ataallugit iliuuseqarnermut tunngasoq pillugu. John Kerryp silap pissusiata allanngoriartorneranut tamatta akiuutissasugut kaammattuutigaa.
