G7-kkut Parisimi isumaqatigiissut pillugu isumaqatigiinngitsut
USA silap pissusia pillugu Parisimi isumaqatigiissummut tapersersuinngikkallarpoq.
Nunat aningaasarsiorfiusut anginerit arfineq-marluk, G-7-imik taaneqartartut Italiami ataatsimeersuarnerannit inaarutaasumik oqaaseqaammi tamanna takuneqarsinnaavoq.
- USA-p silap pissusiata allanngoriartornera Parisimilu isumaqatigiissut pillugit politikkini maanna qulaajarpai, taamaammallu pineqartuni isumaqataasinnaanissaminut inissisimanani, oqaaseqaammi allaqqavoq.
Nunat sinneruttut arfinillit isumaqatigiissutip atuutilijaarnissaa tapersersoraat, inaarutaasumik oqaaseqaammi takuneqarsinnaavoq.
- Canadami, Frankrigimi, Tysklandimi, Italiami, Japanimi Tuluit Nunaannilu naalagaaffinni naalakkersuisunilu siuttut, aammalu EU-p præsidentiata EU-kommissionillu Parisimi isumaqatigiissutip atuutilijaartinnissaanut pisussaaffeqarnertik uppernarsaqqippaat, oqaaseqaammi allaqqavoq.
Trump sapaatit akunnerani tulliani aalajangerniartoq
Tassalu nunat inaarutaasumik oqaaseqaamminni isumaqatigiinngillat, tamannalu nalinginnaasuunngilaq.
USA-p præsidentia Donald Trump Parisimi isumaqatigiissut pillugu sapaatit akunnerata tulliani aalajangissalluni, Twitterikkut allappoq.
Barack Obamap USA-mi præsidentiunerani USA Parisimi ukiup aappaa avillugu matuma siorna isumaqatigiissuteqaqataavoq.
Tysklandip forbundskansleriata, Angela Merkelip, Trumpip aalajangiinissaminik kinguartitsinera pissutigalugu G7-imi silap pissusia pillugu isumaqatigiissummut oqallinnerit naammaginanngilluinnartutut taagai, nutaarsiassaqartitsivik Reuters allaaserisaqarpoq.
/ritzau/
