Assi: KNR

Qujaukitsup danskit isornartorsiorpai

Danskit ministerii Camp Century pillugu isumasioqatigiinnermi oqaatigisaat nunanut allanut naalakkersuisup Vittus Qujaukitsup tupaallaatigaa.

Camp Centuryp avatangiisimut peqqissutsimullu sunniutigisinnaasaanik takussutissaqannginnerarlugu ministerit oqarnerat Qujaukitsup aamma isornartorsiorpaa.

Avatangiisinulli mingutsitsinermut misissuinerit inerneri piariilersut, danskit avatangiisinut ministeriat tusarniaanermi oqaatigereerpaa.

Fakta

Geophysical Research Letters naapertorlugu sakkutooqarfiusimasoq silap pissusiata allanngoriartornera pissutigalugu sermimit ukiumit 2090-imiit saqqumilersinnaavoq.

 

Uulia ikummatissaq 200.000 literi, imikoq 24 millionit liiteri kiisalu toqunartoq PCB annertooq eqqakkallu qinngornernik ulorianartunik akullit qaqugumorsuarmut sermersuup ataaniitinnissaannik isumassarsiarineqarsimasoq eqquutinngitsoortussanngorpoq.

Nalunaarusiaq amigaateqartoq

Misissuinerillu naammanngitsut Qujaukitsup oqaatigaa, qinngornerit radioaktiviusut sunniutigisinnaasai tassani ukkatarineqarsimanngitsut oqaatigalugu. 

Aviisi Sermitsiaq.AG naapertorlugu nunanut allanut ministeri Kristian Jensen nunani tamalaani atomip nukinga pillugu ataatsimiititaliarsuup 1964-imi misissugaanut innersuussivoq, tassanilu atuarneqarsinnaavoq Camp Centuryp eqqaa qinngornernik radioaktiviusunik akoqaranilu inunnut uumasunullu aarlerinaateqanngitsoq.

Aamma atuaruk Aaja: Saliinissamut kikkut akisussaasuunersut oqaatigiumaneqannginnerat naammaginanngilaq

Ministerillu taamatut oqarnera Vittus Qujaukitsup allamik tunuliaqutaqarsoraa, misissuinerup inernera takutissappagu mingutsitsisoqarsimasoq Danmark saliinissamut akiliisariaqassammat.

Timmisartorsuup B52-ip nakkarnera, Pituffimmik ingerlatsineq amerikarmiullu sakkutooqarfigisimasai 
mingutsitsisinnaasut Vittus Qujaukitsup oqaatigaa.

Aamma atuaruk Oqaaseqartartut: Kalaallit Nunaat Camp Centurymut akisussaaqataanngilaq

Aamma atuaruk Immikkut ilisimasalik: Camp Centurymi saliinissamik isumaqatigiissusiortoqarsimanngilaq

Taassuma saniatigut danskit USA-p saliinissaanik qinnuigissallugu nangaassutigigaat, Qujaukitsoq isumaqarpoq.

USA-mi inatsisilerinermut tunngasut suullu USA-p akisussaaffiginerai qulaajarneqaqqaassasut, danskit ilaatigut tunngavilersuutigaat.

Vittus Qujaukitsup nunanut allanut ministeri Kristian Jensen Nuummi novembarip 17-iani ataatsimeeqatigissavaa.

- Ataatsimiinnitsinni suliap naammaginanngilluinnartumik ingerlanneqarsimanera erseqqissaatigissavara, naalakkersuisoq Vittus Qujaukitsoq allappoq.

 

Isummersuutit

inatsisartut_forarssamling_2017_nils_baum_bureau_for_inatsisartut.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat

...allarpassuillu!