Oqaaseqartartut: Kalaallit Nunaat Camp Centurymut akisussaaqataanngilaq
Avatanngiisinut akisussaaffik Kalaallit Nunaata 1989-imi tigunikuugaa, taamaattumillu Nunarput saliinermi akisussaaqataaratarsinnaasoq, danskit avatangiisinut ministeriat danskillu nunanut allanut tunngasunut ministeriat Folketingimi isumasioqatigiinnermi pingasunngornermat taama oqarput.
Aamma atuaruk Danskit nunanut allanut tunngasunut ministeriat Camp Century pillugu isumasioqatigineqalersoq
Kisianni Kalaallit Nunaat akisussaaqataasinnaanissaanut taanna tunngavigissallugu naapertuutinngilaq. Immaqa inatsisilerinermi eqqortuuvoq, ileqqorissaarnerunngilaqm Demokraatit avatangiisinut oqaaseqartartuat Michael Rosing taama oqarpoq.
- Avatangiisinut oqartussaaffiup tigunerani - ulorianarluinnartunillu qimataqartoqarsimasoq ilisimanagu, taava taakkuupput saliinissamut akisussaasuusut, Michael Rosing oqarpoq.
Kalaallit Nunaat saliinermi akisussaaqataaratarsinnaaneranik oqaaseqarneq Partii Naleqqamiittaaq akerlilerneqarpoq.
Nunattami aalangeeqataasimanera qularnartoq, partiip avatangiisinut oqaaseqartartuat Anthon Frederiksenip oqaatigaa.
Aamma atuaruk Partiit saliisoqarnissaa piumasaraat
- Kalaallit Nunatta nunasiaataanerata nalaani pisimavoq. Kalaallit taamani aperineqarsimanissaat ilimaginngilluinnarpara. Akisussaaqataassanngilagut taamatut mingutsitsimanermut uagut. Mingutitsisut akiliisariaqarput akisussaasuullutillu.
Tamannalu eqqissisimatitaanissamut avatangiisinullu ataatsimiititaliap siulittaasuata, Inuit Ataqatigiinneersoq, Kelly Berthelsenip isumaqatigaa.
Kalaallit Nunaata akisussaasuunnginneranut USA-mut Danmarkimullu Nunarput tunngivissaqarluartoq taanna isumaqarpoq.
- Inatsisartunut ataatsimiisitaliat attumassutillit pingaartumik nunanut allanut ataatsimiititaliaq, Naalakkersuisutsinnut saaffiginnittariaqarpoq, danskit naalakkersuisuinut saaffiginneqqullugu politikkikkullu aaqqiiniarneq aallarteqqullugu.
Inatsisartut avatangiisinut ataatsimiititaliaata siulittaasua, Kelly Berthelsen taama oqarpoq.