Pituffimmi kiffartuussinissamik isumaqatigiissut US Air Forcep sivitsorusukkaa
US Air Forcep Greenland Contractorsimut MT Højgaardimit Namminersorlutillu Oqartussanit pigineqartumut isumaqatigiissutiminik sivitsuinissamik kissaateqarluni nalunaaruteqarsimanera, sanartugassanik suliffeqarfissuup MT Højgaardip uppernarsarpaa. Tamanna suliffeqarfiup nalunaarutaani atuarneqarsinnaavoq.
Pituffimmi sakkutooqarfimmi kiffartuussinissamik isumaqatigiissutip 2014-imi suliariumannittussarsiuunneqarnerani Greenland Contractors neqeroortunut ilaavoq.
AAMMA ATUARUK USA-p aallartitaa: Isumaqatigiissummik tamanut tulluartumik peqalissaaq
AAMMA ATUARUK Exelis suliassanngortitseqqilersoq
Suliariumannittussarsiuussinermi amerikamiut suliffeqarfiat Exelis toqqarneqarpoq, tamannali USA-mi eqqartuussiviit ilaannit ukiormanna maajip qaammataani atortussaajunnaarsinneqarpoq Exelisip Danmarkimi piginneqatigiiffimmik aningaasaqanngitsumik taamaallaat pigisaqarnera tunngavigalugu isumaqatigiissuteqarfigineqarsinnaannginnera tunngavilersuutigineqarluni.
- Tamannalu tunngavigalugu isumaqatigiissutip maanna atuuttup 2015-imi septembarip 31-iani atorunnaarnerata kingorna, Greenland Contractorimut isumaqatigiissutip utaqqiisaasumik sivitsornissaa US Air Forcep kissaatigalugu nalunaarutigaa, MT Højgaard taama allappoq.
Tamatumunnga peqatigitillugu suliffeqarfiup erseqqissaatigaa illuatungeriit utaqqiisaasumik isumaqatigiissuteqassappata tamanna isumaqatigiissummi atugassarititaasut allannguuteqartillugit piumaartoq naatsorsuutigalugu.
