Exelis suliassanngortitseqqilersoq
Exelis Servicesip kiffartuussinissamik isumaqatigiissuteqarfigineqarnera amerikami eqqartuussivimmit Federal Court of Claimsimit maajip qaammataata naalernerani atortussaajunnaarsinneqarpoq.
Suliarli naammasseqqajanngilaq, suliammi suliassanngorteqqinnissaa maanna pilersaarutigineqarmat. Amerikamiut aallartitaqarfiat KNR-imut taama ilisimatitsivoq.
Amerikami eqqartuussiviup maajimi naliliinera naapertorlugu, Exelis Services A/S-ip suliariumannittussarsiuussinermi piumasaqaatigineqartut naammassinngilai tamannalu tunngavigalugu piginneqatigiiffiup aningaasaqanngitsup kiffartuussinissamik isumaqatigiissuteqarfigineqarnera atortussaajunnaarsinneqarpoq.
AAMMA ATUARUK Pituffimmi kiffartuussinissamik isumaqatigiissut Exelis Servicesip annaavaa
Suliffeqarfiit marluk suliassanngortitseqqinniartut
Suliffeqarfiup danskinit kalaallinillu pigineqartup Greenland Contractors I/S-ip suliffeqarfiit Per Aarslef A/S aamma Copenhagen Arctic A/S peqatigalugit Pituffimmi sakkutooqarfimmi kiffartuussinissamik isumaqatigiissutip amerikamiut sakkutooqarfiannit suliariumannittussarsiuunneqartup inernera Amerikami eqqartuussivimmut naammagittaalliuutigalugu suliassanngortippaat.
Suliamilu nutaarsiassaq kingulleq tassaavoq Exelis Services suliaq suliassanngorteqqinniarlugu nalunaarummik tunniussaqarsimasoq. Copenhagen Arctic aamma taamaaliorsimavoq. Suliassanngortitseqqinnissamik nalunaarfissaq kingulleq sapaatit-akunnera ataaseq qaangiuppat, juulip 27-ianut, killeqarpoq.
