"Periarfeerussaq" ataataqanngitsut pillugit ingerlariaqqinnaveertoq
Inatsisitigut ataataqanngitsut ataataviminnik nassaarinninnissaminnik kissaateqartut TV-ikkut isiginnaagassiap ”Sporløs”-ip ”Periarfeerussap” ujartorai, KNR-imiit februaarip qaammataani oqaluttuaraarput
Aallakaatitassiamilli suliarinnittut aporfeqalersimapput.
Isiginnaagassiamik periarfeerussamik suliaqartartut paasissutissat ikittuinnaat atorlugit suliaqarnissartik sungiusimagaat, isiginnaagassiamik aaqqissuisup Maria Nyborg Andreasenip KNR-imut oqaatigaa.
- Inummik ujaasiartorluta aallaraangatta nalinginnaasumik paasissutissaminiinnannguit pigisarpagut. Paasissutissallu amerlarujussuartariaqarneq ajorput, meeqqap ulloq unnuarlu angerlarsimaffigisimasaata aqqa, anaanaasup ukioq inunngorfia, ilaqutaasulluunniit arlaata naggatigisimasaa iluaqutaasinnaasaqaaq.
Aamma atuaruk Inatsisitigut ataataqanngitsut pillugit paasisitsiniaaqqittoqassaaq
Aamma atuaruk Inatsit allanngormat ataatassarsiuussinerit amerlisut
Ataatassarsiusinnaatitaaneq
Inatsisitigullu ataataqanngitsut kinguaavinik ujaasiniarnerput nalinginnaasumit erloqinarneroqaaq:
- Paasitinneqarnerput imaappoq - paasissutissaqaraluarpalluunniit - tamakkua pissarsiassaaneq ajorput, ingammik uagutsinnut. Taavalu aamma paasissutissat ujakkatta ilaqutaannut pissarsiassaanatik. Tassalu ajutoornerit tulleriiaatiinnalertarput, Maria Nyborg Andreasen KNR-imut oqarpoq.
Nunatsinni meeqqat pillugit inatsit 2014-imi allanngortinneqarpoq, taamaalilluni 1963-ip siorna uersakkat ataatassarsiornermik suliamik aallartitsisinnaalerput, ataataminninniillu kingornussaqarsinnaalerlutik.
- Soorunami aamma kissaatigaarput, inatsip isiginnaagassiamik taamaattumik suliaqarsinnaalersissagaatigut. Ilumoortorli imaappoq - uagut paasisarput naapertorlugu - inatsit taanna piviusumut iluaqutaavallaanngilaq, Maria Nyborg Andreasen oqarpoq.
Aamma atuaruk Periarfeerussaq" inatsisitigut ataataqanngitsut pillugit aallakaatitassiulersoq
Paasissutissanik pisariaqartunik pissarsisinnaanngitsut
Ataataqanngitsuniillu pisinnaatitsissummik aallakaatitassiortut peqaraluarlutik, kalaallinit oqartussaasunit paasissutissanik pisariaqartunik pissarsisinnaanngillat.
- Neriuutigisimasarput imaappoq, ujaasinerput Kalaallit Nunaanni paasissutissanik ammaasseqataasinnaassasoq. Paasissutissalli taakku qanoq ililluta pissarsiarisinnaanerigut suli paasinngilarput, Maria Nyborg Andreasen oqarpoq.
Aallakaatitassiortulli suli tunniutiinnanngillat, neriuutigaalli oqartussaasut inatsit nutaaq pillugu pitsaanerusumik paasissutissiisinnaassasut:
- Inatsisitigut ataataqanngitsorpassuit inatsit eqqarsaatigalugu qanorpiaq iliussanerlutik aamma nalugunarpaat. Inatsisillu qanorlu ikiorsinnaaneraatsik amma nalullugu. Taamaammat attaveqaqatigiinneq apeqqutaasoraara - immaqa iluamik eqqartorneqarsimanngilaq, Maria Nyborg Andreasen oqarpoq.
Inatsisitigut ataataqanngitsut ataatavitsik pillugu paasissutissanik sumut paasiniaasinnaanerat Ilaqutariinnermut Naligiissitaanermullu Naalakkersuisoqarfiup danskit isumaginninnermut ministereqarfia peqatigalugu ukiaru qaammarsaassutiginiarlugu neriorsuipput.
Periarfeerussami aaqqissuisut inatsisitigut ataataqanngitsunit ataataminnik ujarlerusuttunit attavigineqarnissaminnik suli soqutiginnipput. Uungalu e-mailimut attavigineqarsinnaapput sporlos@dr.dk
