Nunat Avannarliit Nuummi 2017-imi Kulturisioqatigiinnissaannut siuttuusussat toqqarneqartut
Tassaappullu aaqqissuussanik ilusilersuisartoq Pipaluk Lind aamma Finlandimiu saqqummersitsinernik sulianillu aqutsisartoq Rickard Borgström. Taakku Nunat Avannarliit Nuummi Kulturisioqatigiinnissaannut 2017-mi pisussamut akisussaasuussapput, tamarmillu ukioq manna septembarimi sulilissallutik, Nunat Avannarliit Nuummi Kulturisioqatigiinnissaannik aaqqissuisussat tusagassiorfinnut taama nalunaaruteqarput.
Pipaluk Lindip ilaatigut KNR, AWG2016 aamma Kalaallit Nunaat Tivolimi suliffigisimavai, nunatsinnilu kulturikkut suliaqarneq ilisimasaqarfigilluarlugu. Rickard Borgström ilaatigut Norgemi, Tysklandimi, Sverigemi Finlandimilu ukiuni kingullerni aqqaneq-marlunni saqqummersitsinernik suliniutinillu aqutsisartutut kulturilerinerullu iluani ilinniartitsisutut sulisimavoq aammalu kulturikkut aaqqissuussani angisuuni siuttuusarsimalluni.
Kommuneqarfik Sermersuumi borgmesterip Asii Chemnitz Narupip Nunat Avannarliit Nuummi kulturisioqatigiinnissaat pillugu suliaqarnerup aallartittusaanngornera nuannaarutigaa.
- Qularinngilara marluullutik Nuuk nunani avannarlerni kulturimik nutaaliorfittut nuimalernerulersikkumaaraat, taamaasillutillu Nuuk illoqarfittut kulturikkut siumut ingerlarsortutut inissinnissaannut peqataassallutik, Kommuneqarfik Sermersuumi borgmesteri Asii Chemnitz Narup tusagassiorfinnut nalunaarummi taama oqarpoq.