Nunaqarfimmiut nammineerlutik nilliasaatit aallartittassagaat
Karrat kangerluani innuttaasunut sillimaniarnerup pitsanngorsaavigineqarnissaanut kalerrisaarinermut aaqqissuussisoqarnissaanik sulissuteqartoqartoq Namminersorlutik Oqartussat tallimanngormat nalunaarutigaat.
GEUS naapertorlugu, qaqqap ilarujussuata sisoorsinnaanera, tassaarsuarmillu Nuugaatsiamik eqquisup assinganik pilersitsisinnaanera aarlerineqarpoq.
GEUS-imit ajunaarnersuaqarnerata aqaguani oqaatigineqarpoq misissuisoqarfik nunap sajuppillattarneranik uuttortaasinnaagaluartoq paasissutissat misissoqqissaarnissaannut immaqalu taakku ingerlateqqinneqarnissaannut upalungaarsimaniarnikkut aaqqissuussaqanngitsoq.
Kalerrisaarinissamut aaqqissuussinerit nunaqarfinni maanna pigineqartut tassaapput nilliasaatit, taakkulu nunaqarfimmiut nammineerlutik aallartittussaavaat, Qaasuitsup Kommuniani upalungaarsimanermi pisortaagallartoq, David Løvstrøm, taama oqarpoq:
- Kialluunniit ikuallattoqarneranik allatigulluunniit aarlerineqartoqarneranik takkunnittup nilliasaatit aallartissinnaavai, upalungaarsimanermi pisortaagallartoq oqarpoq.
Nilliasaatit tamaasa misissorneqassapput
Upalungaarsimanermi pisortaagallartoq naapertorlugu, Nuugaatsiarmiut Illorsuarmiullu tassaarsuaqarnera sioqqullugu nilliasaatit aallartissinnaasimanngilaat.
David Løvstrømip ajunaarnersuaqarnerata kingorna sulisuni peqqusimavai Uummannap pigisaani nunaqarfinni nilliasaatit tamaasa atorsinnaanersut qulakkeerniarlugu misileraqqullugit
AAMMA ATUARUK Qimarnutitsineq ima ingerlanneqarpoq
Niaqornani, Saattuni, Ukkusissani, Ikerasammi Qaarsunilu najugaqartut, politiinit peqquneqarsimapput kangerluk nakkutigeqqullugu imarlu qaffakkiartulissagaluarpat qaqqamut qimaaqqullugit.
David Løvstrøm oqaluttuarpoq nunaqarfinni ataasiakkaani qatserisartut ajornartoorfimmik pilertoqaqqissagaluarpat nilliasaatit aallarteqqullugit nunaqarfimmiullu qaqqamut majuarteqqullugit ilitsersorneqarsimasut.
GEUS-ip Karrat kangerluani sillimaniarnikkut pissutsit pillugit pingasunngornermi annertunerusumik oqaaseqarsinnaassalluni naatsorsuutigaa.
