Tamaat isigalugu Qimarnutitsineq ima ingerlanneqarpoq

Arfininngorneq nal. 21.40 – Ilisimatuussutsikkut sullissivik GEUS naapertorlugu Karrat Kangerluani nunap sajunnera Richerip uuttuutaani 4-ramiippoq.

Arfininngorneq nal. 21.48 – Nunaqarfimmi Nuugaatsiami tassaarpoq. Malissuit Uummannaq Illorsuillu aamma anguaat. Unnummilu kingusinnerusukkut Upernaviup eqqaa aamma eqqorneqarluni. Inuit sisamat suli maqaasineqartut, illullu aqqanillit imaanit amuneqarsimasut, politiit sapaammi kingusinnerusukkut ilisimatitsipput.

Arfininngorneq nal. 22.15 – Politiit Nuugaatsiami qarsutsisoqartoq kalerrinneqarput. Politiit nal. 23.42 tusagassiutinut nalunaarutaat naapertorlugu politiit, peqqinnissaqarfimmi sulisut upalungaarsimasullu qulimiguulinnik ornigutinneqarput, Issittumi Sakkutooqarfiup umiarsuit qulimiguullillu aamma piffimmut tassungartippaat. Peqqinnissaqarfittaaq piareersimasoq politiinit ilisimatitsissutigineqarpoq.

Politiit 23.42 tusagassiutinut nalunaaruteqarnerminni Uummannap sulluaniittut qaqqanukarnissaat immallu qanittuaniissanngitsut inassuteqarfigaat.

Sapaat nal. 01.46 – Malissuaq Uummannamit 24 milinik avasitsigisumiittoq Uummannallu tungaanut ingerlaartoq politiinit nalunaarutigineqarpoq.

Sapaat nal. 03.26 – Nuugaatsiarmiut qimarnutitinneqaleruttortut politiit paasissutissiipput. Politiit nalunaaruteqarnerminni nuna sajussimanerpaat.

Uuttuinerit nunap sajussimaneranik qulakkeerutaasinnaanngitsut, Ilisimatuup, Peter Vossip sapaammi kingusinnerusukkut nalunaarutigaa. Nal. 21.40 sajunnerit nunap qaqqalluunniit sisoorneranit peqquteqarsinnaasut, Peter Voss oqarpoq.

Assi © : KNR

Qaqqap nakkaasimasup sumiinnera aappaluttumik nalunaaruteqqasumi takuneqarsinnaavoq. Qaqqap nakkaannera tassaartoqarneranut peqqutaasinnaatinneqarpoq. Taannalu Nuugaatsiami aserorteringaatsiarpoq. Takunnissimasup nassuiaateqarnera naapertorlugu sumiissusiliineq KNR-imit suliarineqarpoq.

Sapaat nal. 03.59 – Tusarfiit tutsuiginartut naapertorlugit ajunaartoqarnilu ajoqusertoqarsimasoq KNR allappoq, tamannali upalungaarsimasunit uppernarsarneqanngilaq.

Sapaat nal. 7.44 – Politiinit paasissutissat naapertorlugit Nuugaatsiarmiut 39-t qimarnutitinneqarsimalersut, KNR-imit oqaatigineqarpoq.

Sapaat nal. 9.30 – Politiit Nuummi politeeqarfiup silataani tusagassiortunik katersuutsitsipput. Politimesterip Bjørn Tegner Bayip Nuugaatsiami tassaartoqarneranit inuit sisamat maqaasineqarnerarpai, 78-illu Nuugaatsiamit qimagussorneqarsimanerarpai. Taakkulu saniatigut inuit 19-it nunaqarfimmi najugaqartutut nalunaarsorneqarsimasut sumiissusersiniarnerat sulissutigineqaleruttortoq oqaatigalugu.

Qimarnutitinneqartunit marluk ajoqusingaatsiarsimapput arfineq marlullu annikinnerusumik ajoqusersimallutik.

Sapaat nal. 15.34 – Nuugaatsiamit qimarnutitsineq naammassisoq, politiit nalunaarutigaat.

Sapaat nal. 19.41 – Karrak Kangerluani nunarujussuaq ujaqqallu nakkaasinnaanerata aarlerinarnera peqqutigalugu Uummannap sulluani nunaqarfimmi Illorsuarniittut immap killinganiikkunnaaqqulluni qaqqamullu majuaqqullugit, politiit inassuteqarput.

Upalungarsimasullu Nunaqarfinni innuttaasunik qimarnutititsilersut politiit paasissutissiipput.

Sapaat nal. 20.45 – Saattuni, Ukkusissani, Niaqornani Qaarsunnilu innuttaasut politiinit aarlerisaarneqarput. Innuttaasut immap qanoq issusaannik maluginiaaqquneqarput, ulikkiartulissappallu qaqqamut majuaqquneqarlutik.

Illorsuarmiut Issittumi Sakkutooqarfiup umiarsuaanut Vædderinnimut qimarnutitinneqartut, politiit paasissutissiipput.

Sapaat nal. 22.39 – Niaqornani innuttaasut qimarnutitinneqarnissaat aalajangerneqartoq politiit nalunaaruteqarput.

Ataasinngorneq nal. 02.09 – Niaqornani najugaqartut tamarmik alapernaasartuummut Vædderinnimut qimarnutitinneqalereersimasut nalunaarutigineqarpoq. Ikerasanni, Saattuni, Ukkusissani Qaarsunnilu innuttaasut immap qanoq inneranik nakkutiginniinnaqquneqarput.

Vædderenimit ataasinngornermi ullaaralaakkut nalunaarut naapertorlugu, qaqqaq annertuumik sisoorsimasoq takuneqarpoq, sisooqqissinnaaneralu aarlerigineqarluni.

Ataasinngorneq nal 04 missaani – Issittumi Sakkutooqarfiup Karrat Kangerluani nakkaasoqarfiungaatsiarsimasumit assinik saqqummersitsivoq. Karrat Kangerluani innaq 300 x 1100 meteriusoq imaanut sisoorsimavoq. Issittumi Sakkutooqarfik naapertorlugu arfininngornermi tassaarneranut tamanna peqqutaassangatinneqarpoq. Qaqqami qanittumi nakkaangajattoqarsimasoq aamma assilineqarsimavoq.

Ataasinngorneq nal. 12.17 – Illorsuarnit Niaqornaniillu innuttaasut Uummannamut Aasiannullu qimagussortinneqartut 70-it missaanniittut poliitit ilisimatitsipput.

Nalunaarut naapertorlugu Vædderen Uummannamut ataasinngornermi ullaakkut tikippoq Ejnar Mikkelsenilu ataasinngornermi ualikkut tikissasoq naatsorsuutigineqarluni.