Ajunaarnersuaqarnermut pisortap suliniuteqartut nersualaarai
- Nuugaatsiami ajunaarnersuaqarnerani pisortat suliaqarsimanerat nersualaassallugu pissutissaqarluarpoq.
Ajunaarnersuaqarneranut atatillugu Røde Korsip pisortaata, Arne Vågen taama naliliivoq.
- Isumaqarpunga ajunngilluinnartumik tamanna pisoq, Kalaallit Nunaannimi pisortat innuttaasut ajunnginnerpaamik qujanartumik sullikkusuppaat, Arne Vågen oqarpoq.
Taanna nunarsuarmi ikiuiniarnermut ukiut 30-t suleqataasimavoq. Ilaatigut Filippinerini kiattup anorersua tyfoni 2013-imi ajunaarnersuaqartitsimmat suleqataasimavoq, Rwandamilu 90-ikkunni inuiannik toqoraasoqarmat ikiuussimalluni.
Pisariaqartitsineq naapertorlugu sullissisoqartoq
Arne Vågenillu pisortat qanoq qisuariarsimanersut takusimavaa.
- Nunarsuarmi pisut tassanngaannaq tamarmik pisuusimasanngillat. Kalaallit Nunaannili pisortat innuttaasut eqqugaasut ajunnginnerpaamik sulikkumavaat tamannalu aallaaviulluarpoq, Røde Korsip pisortaa Arne Vågen oqarpoq.
Ajunaarnersuaqarneranut atatillugu Røde Korsip pisortaata ilisimatitsissutigaa, Dansk Røde Kors ikiuiniartunik Danmarkimit Nunatsinnukartitsinissamut pisariaqartitsisoqassagaluarpat neqeroorsimasoq.
Pisortalli pisariaqartitsineq naapertorlugu sullissipput.
Ikiuuttut nersualaarpai
Piviusorlu unaavoq, ajunaarnersuaqalermalli Kalaallit Røde Korsiat aallaqqaataaniillu ikiuinialerpoq tamannalu ajunngilluinnarpoq, Arne Vågen oqarpoq:
- Kalaallit Røde Korsiata ikiueqqaarneranit sulisimanera pitsaalluinnarpoq pimoorussisoqarpoq tamannalu ajunngilluinnarpoq.
Savalimmiuni Islandimilu innuttaasut ikiuussimanerat aamma nersualaarpaa.
- Isumaqarpunga pisoq pillugu ersoqatigiittoqarlunilu ikiuukkusussusermik takutitsisoqarluartoq.
Tamanna aamma Danmarkimi Savalimmiuni Islandimi Kalaallit Nunaannilu malugineqarsinnaavoq, ikiuuttoqarnissaanummi pimoorussilluartoqarpoq, Ajunaarnersuaqarneranut atatillugu Røde Korsip pisortaa, Arne Vågen taama oqarpoq.
AAMMA ATUARUK Qaasuitsup tikittut nalunaaruteqaqquai
AAMMA ATUARUK Sommerferie gav plads til evakuerede
AAMMA ATUARUK Qaqqaq navianaatilik oqartussanit suli misissuiffigineqartoq
AAMMA ATUARUK Nunaqarfiit inoqanngitsut politiit nakkutigigaat
