Kulturi

VIDEO Niviaq Korneliussen Aasianni tupaallattoq

Atuakkiortoq Niviaq Korneliussen atuakkiani, Homo Sapienne, pillugu saqqummiimmat Aasianni Avannaani Ilinniarnertuunngorniarfimmi soqutigineqarluarpoq. Takkuttorpassuit tupaallaatigai.

Allattoq Jens Rafaelsen, Marie-Kathrine Barlaj Lyberth

apriilip 19-at 2016 16:13

Assigusunik Nuummi pisoqaraangat inuit takkuttut killeqartarput. Niviaq Korneliussenip taamaammat qanoq amerlatigisut GU-p inersuaanut takkutissanersut pissanngatigaa.

- Nuummi taamatut saqqummiussingaangama, assersuutingillugu, inuit killeqalaartut takkuttaramik. Taava takorlooruminaatsinnikuuara. Inuit immaqa qulit, tallimat aggissappat? Taava ippassaq unnukkut maanga iserama inuit immaqa 100-jut sinnerlugit, amerlasoorujorujussit, GU-p aula ulikkaavillugu aggiasut tusarnaariarlutik, Niviaq Korneliussen KNR-imut oqarpoq.

Aamma atuaruk Kalaaleq inuusuttoq atuakkiaminik saqqummersitseqqaalerpoq

Atuakkanik Atorniartarfimmit katerisimaartitsisuuvoq, taasanilu atuakkiartup suiaqatiminoortut Nunatsinni atugaat pillugit atuakkiani, naliliisartunit nersualaarneqartoq, sammitillugu eqqartortippai.

- Saqqummiukkamingit tamakkua ullutsinni eqqartorneqarneq ajortut. Soqutigisimavarput inuttaa tikisillugu qanimut illoqarfitsinni nunaqqatitsinnut saqqummiussitillugu, atuagaatilerisoq Hanne Jerimiassen oqarpoq.

Inunnuaq Larsenip Homo Sapienne atuarlugu tiguartippoq isummassarsillumnilu, katerisimaaneeqataanerminilu pisssarsiaqangaatsiarlugu.

- Inuusukkaluarluni taamatut qanoq uparuarneqarsinnaanermut tunngasunik tingusaqarsinnaaneq, ilaa. Tunniutiinnaqinani, taamatut, soorlu assersuutigiinnarlugu taanna. Allatigut paasissutissat kinaassutsimut tunngasut, taakku aamma ilaana tusaatissatut uanga nammineq tingusinnaavakka, Inunnguaq Larsen oqarpoq.

Aamma atuaruk VIDEO Atuakkiortup inuusuttup atuakkiaqqaatini quppeqqaaraa

Inuusuttut atuakkiortumut aamma apeqqutissaqaqaat.

- Assut tupaallaatigivara nuannaarutigersuaarlugulu. Taavalu aamma malunnarluni, ilaa, inuusuttut soqutiginnittorujorujussuusut.

- Ittuuinnatik aperisaqattaarujoorlutik, illaqatigisarlunngalu, taavalu kalaallisut ingerlanneqarluni, aamma taannartaa assut nuannaarutigivara, Niviaq Korneliussen oqarpoq.

Niviaq Korneliussennip atuakkiaa Homo Sapienne 2014-mi saqqummerpoq. Kingornalu arlalinni nersornaaserneqartussatut innersuunneqarnikuulluni - Politikenip Atuakkiortunut nersornaasiuttagaa, Nersornaat Danmarkimi siullermeersumik atuakkiortumut tunniunneqartartoq - Munch-Christensens Kulturlegat Nunat Avannarliillu Siunnersuisoqatigiivisa atuakkiamut nersornaat.

Aamma atuaruk Niviaq Korneliussen nersornaaserneqartussatut innersuunneqarpoq

Aamma atuaruk Norgemiu nersornaasigaavoq