Niviaq Korneliussen nersornaaserneqartussatut innersuunneqarpoq
Oqaluttualiat sisamat, inuup allaatigisap inuunerata oqaluttuarisaaneranik atuakkiat marluk, taalliallu katersukkat, nersornaammik Politikens Litteraturpris 2014-imik nersornaaserneqartussatut innersuunneqarput. Niviaq Korneliussenip atuakkiaa "Homo sapienne" innersuunneqartunut ilaavoq.
Allattoq Mads Lynge
Kina nersornaaserneqassanersoq atuartartut taava maanna aalajangertussaavaat, nersornaallu 200.000 koruuninik aningaasartaqarluni.
Taasisitsineq ullumi aallartippoq, oqarasuaallu angallattagaq pappiararluunniit taasinermi allaffissaq atorlugu taasisoqarsinnaassalluni.
Politikens Litteraturpris pingajussaa tunniunneqartussaavoq, atuakkiallu tuusintit missaanniittut aviisip taassuma ukiuni kingullerni allaatigisimasai aallaavigalugit nersornaasiisoqartarluni.
Siullerpaamik nersornaasiisoqarmat Kim Leinep atuakkiaa "Profeterne i Evighedsfjorden" nersornaaserneqarpoq, Yahya Hassanilu siorna nersornaaserneqarluni.