Qujaukitsoq: Issittoq pillugu Obamap suliaanik iluatsinngitsut amerlapput
- Iluatsinngiffippassuaqarpoq ajoraluartumik naalakkersuisut tunualersut minnerunngitsumik uagut Nunatsinni illersornissamut sakkutooqarnikkullu USA-mut ilaatigut aamma attuumassuteqartuni suliani suli maannamut aaqqiivigineqarsimanngitsunik arlalinnik suliaqarput, Vittus Qujaukitsoq oqarpoq.
Tamannalu ilaatigut amerikamiut Pituffimmiinneranni iluaqutaasinnaanerusumik isumaqatigiissuteqarnissap amigaataaneranut tunngavoq, naalakkersuisunngortullu ammanerusumik ingerlariuseqarnissaat Vittus Qujaukitsup neriuutigaa.
AAMMA ATUARUK Trumpip USA-mi ataqatigiissitsiniarluni neriorsuutigaa
Ilisimatuulli arlallit oqaatiginikuuaat Nunatta pitsaanerusunik isumaqatigiissuteqarnissaa Donald Trumpip præsidentiunerani periarfissalunnerussasoq. Tassami nunat amerikamiunit sakkutooqarfigineqartut sakkutuunit illersorneqarnertik ilorrisimaarutigiinnarniarunikku tunniussaqarnerusariaqartut, Donald Trumpip nalunaarutiginikuuaa.
Vittus Qujaukitsorli isumaqarpoq Nunarput tunniussaqareernikooqisoq.
- Isumaqarpunga ukiut 76-iunngulersut kingulliit kingumut qiviarutta, Nunatta nunataanik imartaanik silataanillu amerikamiut akeqanngitsumik atuisimanerat tassunga killitsikkusunneqartoq, Vittus Qujaukitsoq oqarpoq.
AAMMA ATUARUK Nunatta aningaasatigut imminut napatilernissaanut Trumpip ikiorsinnaavaatigut
Taamalu oqarnermini isumaqarpoq Nunarput NATO-mi nunaniit tapersiinerusoq.
Pitsaanerusunik isumaqatigiissuteqarnissamik kissaateqarneq Vittus Qujaukitsup peqataaffigisaani qanittumi akerleriissuteqarnermi aallarnerneqarpoq. Taamalu iliuuseqarnini Inatsisartuni ilaasortameersuunerarpaa oqaatigalugulu suliaq taanna taamaatiinnarniarnagu.
AAMMA ATUARUK Trumpip ivertinneqarnera ima ingerlanneqassaaq
- Inatsisartut tunngaviusumik aalajangerneranni piumasarineqarpoq Nunatta sakkutooqarnikkut allatigullu atorneqarnerani aningaasatigut iluaqusiinissaa taanna anguniarneqassasoq taamaattumik ersarissumik naalakkersuisuni Inatsisartuniit piumaffigineqaluta anguniarsaraarput, Nunatta tamakkununga atorneqarnerani sapingisamik iluaqutissanik annerpaanik pissarsinissaa anguniarlugu suliniassasugut, nunanut allanut naalakkersuisoq, Vittus Qujaukitsoq oqarpoq.
