Trumpip USA-mi ataqatigiissitsiniarluni neriorsuutigaa

Præsidentinngortussap qineqqusaarnermini nersiorsuutigisani Washingtonimi Lincolnip eqqaassutissaata saavani uteqqippai.
Assi © : Gage Skidmore/Flickr Creative Commons
Allattoq Ritzau
januaarip 20-at 2017 06:20
Nutserisoq Simon Uldum -

Aningaasaatilissuup Donald Trumpip USA-mi præsidentitut ivertinneqarnissaminut aqaguttoq nunami ataqatigiissitsiniarluni neriorsuutigaa.

Republikaneri qinigassanngortimmat Præsidentip Illorsuanut iserternissaa ilimagineqarpallaanngikkaluarpoq.

USA-mili præsidentit 45-ssaattut tassani uppernarsaatinneqartussanngorpoq.

Donald Trump 70-inik ukioqartoq nulianilu Melania New Yorkimit Washingtonip eqqaani sakkutooqarfimmut sisamanngormat aallarpoq.

Ualikkut Washingtonimiippoq, tassanilu tallimanngornermi ivertitsinissani sioqqullugu ileqquusumik aaqqissuussinerit peqataaffigai.

- Nunatsinni ataqatigiissitsissaagut. Nunatsinni ukiorpassuarni isumagineqarsimanngitsut isumagissavagut. Allaanerusumik pisoqassaaq. Taama neriorsorpassi, Donald Trump Washingtonimi Lincolnip eqqaassutissaata saavani tapersersortiminut tuusinterpassuarnut taama oqarpoq.

Kongressimi siuttuulersussat Donald Trumpillu ministerissai sisamanngornermi aamma nereqatigai.

Tamanna naammassimmat Arlingtonimi iliveqarfissuarmiippoq, tassanilu sakkutuujusimasut eqqaaniarneqarlutillu nersorniarneqarput.

- Aatsaat taama katersuuttoqartigivoq, Donald Trump taama oqarpoq, pingaartumik sulisartukkormiunit tapersersorneqarluarnini innersuussutigalugu, taakkumi Hillary Clintonimut ajugaanissaanik qulakkeerisuummata.

Nutaarsiassaqartitsivik Reuters naapertorlugu, qinersinermi sulisartukkormiut Donald Trumpillu USA-mi "politikkikkut qaffasinnerusumik" inissisimasutut taagugaata avissaartuuteqqanerannik ersersitsivoq.

- Puigorneqaqqissanngilasi. Mumisissavarput. Suliffiit utertissavagut, Donald Trump tapersersortiminut taama oqarpoq.

Præsidentinngortussap ullormut pisut Twitterikkut kingorna ima allaaserisai.

- Lincolnip eqqaassutissaanut unnukkut manna takkuttorpassuarnut qujanaq. Peqatigiilluta USA siumut saatsissavarput, Trump taama allappoq.

/ritzau/Reuters