KNR-ip Nunafonden pillugu tusagassiinera Tusagassiinermut tunngasuni aalajangiisartut akueraat
KNR-ip Nunafondenimi pissutsinik isornarsinnaasunik siornaak qulaajaanera malittarissat malillugit pivoq. Tusagassiinermut tunngasuni aalajangiisartut sivisuumik utaqqineqareerlutik taama akissuteqarput.
Aningaasaateqarfiup ingerlanneqarneranut aningaasartuutit Radioaviisimit KNR.GL-imillu 2013-ip naalernerani qulaajaaffigineqarput.
Suliaq Tusagassiinermut tunngasuni aalajangiisartunit qaqinneqarpoq
Taamani siulittaasuusoq Per Berthelsen suliaq pillugu KNR-imut oqaaseqarumanngilaq, KNR.GL-illi Sermitsiaq.AG-llu allaaserisaasa oqaaseqaateqartarfiini isornartorsiuilluni allappoq nammineq Nunafondenilu paasissutissat avammut saqqummiunneqannginnerini oqaaseqaateqarnissaminnut periarfissinneqarsimanatik. Taamaammat Tusagassiinermut tunngasuni aalajangiisartut namminneerlutik suliaq naliliiffiginiarlugu aalajangerput.
Aamma atuaruk Nunafondip ingerlannera akisuvoq
Nunafondenip naammagittaalliuutigisai tassaapput KNR-ip tusagassiinera aammalu Sermitsiaq.AG-ip KNR-ip tusagassiineranik issuaalluni tusagassiisimanera.
Nunafondenip akissutaa unnerluussummit illuatungilerneqartoq
Per Berthelsenip oqaaseqarusussimannginnera KNR-imit ilisimatitsissutigineqarnera, ataasiarlunili, issuaavigineqarani, aningaasaateqarfiup siunissaq eqqarsaatigalugu qanoq iliuuseqarniarneranut oqaaseqarusunnginnera kiisalu aningaasartuutit qaffasissusaat pillugit apeqqutinut Berthelsenip oqaaseqarusussimannginnera Tusagassiinermut tunngasuni aalajangiisartut pingaartillugit maluginiarpaat. .
- KNR-ip akissutaa Nunafondenimit ilanngunneqartumi uppernarsarneqarpoq, tassani ilisimatitsissutigineqarmat siulittaasoq siulersuisunilu ilaasortat sinneri Radioaviisimut oqaaseqarnissartik kissaatiginngikkaat, Tusagassiinermut tunngasuni aalajangiisartut aalajangiinerminni taama allapput.
Aamma atuaruk Nunatta juulimaavanut - Nunafondenimut akiligassat qaleriaapput
Tamannalu tunngavigalugu Tusagassiinermut tunngasuni aalajangiisartut ilisimatitsissutigaat KNR Radioaviisip Sermitsiaq.AG-llu tusagassiinermut tunngatillugu ileqqoreqqusanik nalinginnaasunik unioqqutitsisimanngitsut.
Aamma atuaruk Siulersuisut imminnut ajunngitsorsiassalersorsuaartut