KNR-imi siulersuisut siulittaasortaartut
Naalakkersuisut KNR-imi siulersuisunut siulittaasussamik toqqaapput. Ilinniartitaanermut, Kultureqarnermut Timersornermut Ilageeqarnermullu Naalakkersuisoqarfik tusagassiuutinut nalunaaruteqarpoq.
Siulersuisunut siulittaasuusimasup ukioq manna februaarip aallaqqaataani tunuarnerata kingunerisaanik Rosannguaq Rossen siulersuisunut siulittaasussatut toqqarneqarpoq.
Siulittaasuusimasoq qaammatini 13-iinnarni siulittaasooreerluni nammineq pissuteqarluni tunuarpoq.
Rosannguaq Rossenip siulittaasussatut toqqarneqarnini nuannaarutigaa, suliaqalernissanilu qilanaaralugu:
- KNR-ip siulersuisunut ilaalernissara tulluusimaarutigaa. Naalakkersuisut uannik toqqaanerannik qutsavigerusuppakka, taanna KNR-imut oqarpoq.
Misilittagaqartoq
Rosannguaq Rossen Kommuneqarfik Sermersuumi aaqqissuussinermut ineriartortitsinermullu pisortaavoq.Taanna issittumi ilisimatusarnermi pd.h-qarpoq ukiunilu arlalinni Ilisimatusarfimmi ilisimatusartuullunilu ilinniartitsisuusimalluni.
Taamaalilluni tusagassiuutinut tunngatillugu misilittagaqarluarpoq - taamaakkaluartorli siulersuisut siulittaasuattut atuunnermini qanoq suliaqassanerluni oqaatiginissaanut utaqqilaaqqaarniarpoq:
- KNR-ip pisortaata, sulisuisa siulersuisullu naapinnissaat suliassama pingaarnersaraat.
Rosannguaq Rossen Københavnimi inunngorpoq, Sisimiunilu peroriartorluni, taannali 2005-imili Nuummi najugaqarpoq.
KNR suli ilungersuasoq
Siulersuisut siulittaasortaavat KNR-ip nutaarsiassaqartitsiviani sulisut ilungersuaneranni atuutilissaaq.
KNR-ip nutaarsiassaqartitsiviani tusagassiortut kalaallisut oqaasillit amigaatigineqangaatsiarnerat pissutigalugu nutaarsiassaqartitsinermik ukiaq annikilliisariaqarnikuuvoq.
Tamanna Rosannguaq Rossenip siulersuisut KNR-imilu sulisut suleqatigalugit aamma suliassarissavaa:
- Tusagassiortut – pingaartumik kalaallit amigaataangaatsiarnerat maluginiarnikuuvara. Tamanna siulersuisut sulisullu suleqatigalugit qanoq aaqqiiffigineqarsinnaanerata misissorluarnissaa qilanaaraara, taanna oqarpoq, nangillunilu:
- Siulersuisut sulisullu suleqatigiittariaqartut eqqarsarpunga. Sulisut atugarissaarnerat qanorlu ilungersuuteqarnerat misissussagigut isumaqarpunga. Taamaalilluta ataatsimut aaqqiissuteqarsinnaallutalu qajannaatsumik tunngaviliisinnaassalluta.
Radioaviisimi kalaallit tusagassiortut tallimat amigaatigineqarput, maannakkullu kalaallit aalajangersimasumik atorfeqartut marluinnaapput.
Nutaarsiassaqartitsivimmi pisortap ukiut nikinnerani soraarnerata kingorna nutaamik atorfinitsitsisoqaqqammerpoq.
