KNR suli ajornartooqqasoq
KNR-ip Nutaarsiassaqartitsiviani tusagassiortut suli amigaatigineqarput, ajornartorsiullu minnerulinngilaq.
Ullaakkut, ullup qeqqanut unnukkullu nutaarsiassaqartitsinissamut atatillugu radioaviisimi tusagassiortut kalaallit tallimat danskillu pingasut amigaatigineqarput. Radiaviisinut tusagassiortut amigaatigineqarnerupput – taamaakkaluartorli tamanna knr.gl-imut Qanoruumullu aamma eqquivoq, KNR-immi tusagassiortut nikerartittariaqarpai.
Taamaammat KNR-ip annikinnerusumik nutaarsiassaqartitsiinnassaaq.
Tassa imaappoq ullup qeqqanut radiaviisip aallakaatinneqarnera nalunaaqutaq arfinermut aallakaatinneqaqqittassaaq, knr.gl-imullu ilanngutassiat ikinnerussallutik kiisalu Qanorooq qaammatini marlunni tulliuttuni 15 minutsiinnarmik sivisussuseqartassaaq.
Akissarsiat appasittut inissallu amigaataanerat
- Radioaviisip qallunaatoortaanut qallunaanik pingasunik atorfinitsinissarput iluatsipparput februaarillu naanerani sulisut tamarmiuleqqissapput. Taamaattorli kalaallinik tusagassiortunik atorfinitsitsinngilagut qinnuteqartoqannginnera peqqutaalluni, pisortaq Annga Lynge, oqarpoq nangillunilu:
- Taartaagallarsinnaasunik ikiortaasinnaasunillu sulisoqartarpugut, sulili amigaateqaqaagut. Suli aammaarluta sulisoqarnikkut pissutsit aaqqiiviginiarlugit iliuuseqassaagut nalunngikkaluarlugu akissarsiat appasinneri peqqutigalugit tunuartertoqartartoq aammalu Namminersorlutik Oqartussat aqqutigalugit sulisunut inissianik atorfinittunut attartortitsisariaqartarnerput apeqqutaasartoq, Annga Lynge oqarpoq.
Sulisut amigarnerat isornarluinnartoq
Tusagassiortut amigarnerat pissutigalugu nutaarsiassat ikilineqarnissaat tusagassiorfiup aqutsisuisa novembarip aallartinnerani aalajangerpaat. Taamani tamanna ukiup sinneranut atuutissasoq saqqummiunneqarpoq.
Sulisunik attassinissamut atorfinitsitsinissamullu qanoq iliortoqassanersoq pisortap siulersuisullu oqaatigisinnaanngilaat. Maannalu nutaarsiassat ikinnerutinneqarnerat marsip aallaqqaataanut sivitsorneqarpoq.
Pissutsit sulisunut kisimi ajornartorsiutaanani kalaallinut inuiaqatigiinnut aamma eqquivoq, tamanna Danskit tusagassiortut kattuffianni siulittaasup tusagassiuutillu pillugit ilisimatusartut marluk novembarimi oqaatigaat.
