KNR-ip siulersuisuisa siulittaasumi tunuareernerani akisussaaffik naalakkersuisunut ingerlateqqippaat

KNR-imi siulersuisut siulittaasoq - oqaaseqarpallaaranilu tunuarpoq. Mette Steenholdtip qaammatit 13-iinnaat siulittaasooreerluni sooq tunuarnini oqaatigiumanngilaa - ”tunuarnini inuttut pisunik pissuteqartoq”,  Linkedinimi ippassaq ualikkut allappaa.

KNR-ip nutaarsiassaqartitsiviani sulisoqarnikkut ajornartorsiuteqarnerup nalaani tunuarpoq.

Taassumali siulersuisut siulittaasuatut tunuarnissani “piffissami sivisuumi” eqqarsaatigisimallugu oqaatigaa, tamannali qanorpiaq isumaqarnersoq nassuiaatiginngilaa.

Tamatuma saniatigut Mette Steenholdt oqaaseqanngilaq. Aamma KNR-ip qullersaqarfiata sinneranit oqaatigineqartut annikitsuinnaapput.

Miki Jensen KNR-ip siulersuisuini siulittaasup tullersortaa siulittaasuugallalerpoq.

- Mette Steenholdtip tunuarnera tusaatissatut massakkut tiguarput. Naalakkersuisut siulittaasussamik toqqaanissaat utaqqineqarpoq. Taava siulersuisuninngaanniit takorloorparput aalajangiineq piffissami qaninnerusumi pissasoq, taanna oqarpoq.

Piffissaq qaninnerusoq uuttuummi sumiippa?

- Naluara, kisianni tassa tamanna tunngavigalugu ataqqiniarlugu processi annerusumik oqaaseqaatissaqanngilanga.

KNR-ip pisortaa, Annga Lynge aamma taama nalunaaruteqarpoq.

- Siulittaasup tullia siulittaasuugallalissaaq. Naalakkersuisut namminneq naliliinertik tunngavigalugu siulittaasussamik nutaamik toqqaanissaat pissusissamisuussaaq, taanna oqarpoq.

Mette Steenholdtip tunuarnera ajornartorsiummut aaqqiivigineqanngitsumut attuumassuteqarnersoq aperineqarami ima akissuteqarpoq: 

- Naluara. Nalunngilarput inuttut pissuteqartumik tunuartoq.

Kultureqarnermut naalakkersuisup, Aqqaluaq B. Egedep (IA) siulersuisut siulittaasussaannik toqqaanissaq pingaarnertut suliarissallugu KNR-imut oqaatigaa:

- Isumaqarpunga killiffik aallaavigalugu iliuuseqarnissarput naalakkersuisut tungaaninngaanniit pingaarnertut suliassarigipput.

Nutaarsiassani ippassaq atuarneqarsinnaasoq

Siulersuisuni siulittaasup ajornartorsiuteqarnerup nalaani tunuarnera ippassaq ualikkut nutaarsiassiissutigineqarpoq. KNR-imi sulisut nunatsinni nutaarsiassaqartitsiviit nittartagaanni atuanngikkallaramikku ilisimasaqanngillat.

Siulersuisut tamanna piffissami sivisunerulaartumi ilisimasimavaat.

- Siulittaasoq tallimanngormat ualikkut nalunaaruteqarpoq. Tamatuma kingorna aqutsisut siulliullugit ilisimatinneqarput. Tamatumalu kingorna sulisunut ullumi ataasinngornermi nalunaarutigineqarluni, Annga Lynge oqarpoq.

Mette Steenholdtip tunuarnini LinkedIn-ikkut sapaammi ualikkut nalunaarutigaa. Nutaarsiassaq tamanna Sermitsiaq.ag-mit knr.gl-imit radioaviisimiillu sapaammi ualikkut takuneqarpoq.

Annga Lynge, periaaserisaa qanoq isigineqassava?

- Tamanna inuttaanut apeqqutigineqarsinnaavoq, pisortaq oqarpoq.

KNR-ip nutaarsiassiisarnini ukiaq annikillivaa, tamanna nutaarsiassaqartitsivimmi tusagassiortut kalaallisut oqaatsillit amigaataangaatsiarnerannik pissuteqarpoq.

Radioaviisimi kalaallit tusagassiortut tallimat amigaatigineqarput, maannakkullu kalaallit tusagassiortut aalajangersimasumik atorfeqartut marluinnaapput.

Tamatuma saniatigut nutaarsiassaqartitsivimmi nutaarsiassaqartitsinermut pisortaq ukiup nikinneranit soraarniarnikuummat maannakkut pisortaqanngilaq.