Tusagassiuinermi Sulisut Peqatigiiffiat KNR-ip ilungersuanera pillugu: Politikerit tusagassiuuteqarnermut sumiginnaapput

Tusagassiuinermi Sulisut Peqatigiiffiat KNR-ip nutaarsiassanik ikiliisariaqaqqinnera pissutigalugu Inatsisartunut naalakkersuisunullu isornartorsiuivoq.

Allattoq Hanna Vestergaard Hviid

januaarip 25-at 2024 17:04

KNR-ip kalaallinik tusagassiortussarsiniarnerata ajornartorsiutaajuarnera pissutigalugu ukioq nutaarsiassat ikilisinneqaqqanerata sivitsoqqinneqarneranik aallartippoq.

Tusagassiuinermi Sulisut Peqatigiiffiat, TP maanna qisuariaateqarpoq. Peqatigiiffik tusagassiuutinut nalunaaruteqarnermini naalakkersuisunut isornartorsiuivoq.

- Nunatsinni isorartoqisumi innuttaasut nutaarsiassanik suliarilluakkanik apeqqusiisinnaassusilinnillu ulluinnarsiuteqartussaagaluartut eqqugaapput. Inuiaqatigiinni pissaanerit sisamaattut taaneqartartoq nukillaaraluttuinnarpoq, KNR-illu inuiaqatigiinnut pisussaaffini kivissinnaajunnaarpaa, TP allappoq.

Aamma atuarukKNR suli ajornartooqqasoq

Radioaviisimi kalaallit tusagassiortut tallimat amigaatigineqarput, maannakkullu aalajangersimasumik atorfeqartut marluinnaapput.

Imaapporlu ullup-qeqqanut radioaviisi unnukkut arfinermut aallakaateqqinneqartarpoq, knr.gl-imi nutaarsiassat amerlassusaat ikinnerupput, Qanoroorlu qaammatini marlunni aggersuni minutsinik 15-iinnarnik sivisussuseqartassalluni.

- Ataasiinnarluunniit peeraluarpat ajunaarnersuartut ittumik pisoqassaaq. Nutaarsiassaqartitsivik pineqartoq nunatsinni upalungaarsimanermi pingaarutilittut inissisimasoq ikiorfeerutilerpoq, TP allappoq.

Tusagassiuutinik sumiginnaaneq

Tusagassiuinermi Sulisut Peqatigiiffiata KNR-imi ajornartorsiutit politikerit tungaanniit sumiginnaanerunerarpai.

Peter Olsenip naalakkersuisutut upernaaq Inatsisartuni oqallinnermi tunuarnera pissutigalugu suliap sukumiinerusumik ukkatarineqalernissaanik kinguneqassasoq peqatigiiffiup neriuutigisimagaluarpaa.

Aamma atuaruk Nivi Olsen KNR-ip ajornartoornera pillugu: Tatiginninnginnermik taasititsinissamik siunnersuuteqaratarsinnaasoq

Naalakkersuisuusimasulli neriorsuutigisimasaa suleqatigiissitaq suli takuneqanngilaq.

- Nunami namminersulivinnissamik siunnerfeqartumi tusagassiortut apeqqusiisinnaasut paasissutissiisinnaasullu aatsaat taama pingaaruteqartigipput, TP allappoq.

Akissarsiaqartitsisoqarnerussasoq

Amerlasoorpassuariarlugu oqaatigineqareersutut kalaallinik tusagassiortunik pilerisaarinissamut attassiinnarnissamullu akissarsiat pitsaanerunissaat pisariaqarpoq.

KNR INNUTTAASUNIK KIFFARTUUSSINISSAMIK ISUMAQATIGIISSUTEQARPOQ

KNR nunatsinni nutaarsiassaqartitsivinni innuttaasunik kiffartuussinissamik isumaqatigiissutilinni kisiartaavoq. Tassa aningaasaqarnermut inatsimmit atugassatut akuerisaannarnik aningaasalersorneqarpoq, aammali innuttaasunik kiffartuussinissamik isumaqatigiissummut pituttorsimallunilu taanna malillugit KNR-imut suliakkiutit aalajangersimasuupput.
KNR-imut suliakkiutit soorlu assigiinngitsunik nutaarsiasseeriaaseqarnermut, paasissutisseeriaaseqarnermut, ilinniartitaanermut, eqqumiitsuliornermut aliikkuersueriaaseqarnermullu tunngasuupput.
KNR-ip aamma illuinnaasiunngitsumik, kinaassusersiunngitsumik, assigiinngisitaartunik taavalu sullinniakkanut sammilluinnartumik oqaatsinillu eqqortumik atuilluni nutaarsiassiisarnissaa aamma piumasaqaataavoq.

Najoqqutaq: Innuttaasunik kiffartuussinissamik isumaqatigiissut

Allisiguk

TP-p tamanna aaqqiissutissatut aamma oqaatigaa. Pingaartumik KNR-imi tusagassiortutut sulisut Namminersorlutik Oqartussanilu attaveqaqatigiinnermut sulisut akissarsiaat nikingangaatsiartut takuneqarsinnaavoq.

- Ajornartoorneq ulluinnarsiutigilissallugu akuersaarneqarsinnaanngilaq. Akissarsiat sulinermilu atukkat pillugit isumaqatigiinniarnerit qaammatialuinnaat qaangiuppata pisussaapput. Tusagassiortut akissarsiaqarnerusariaqarput, TP-p siulittaasua, Arnaq Nielsen tusagassiuutinut nalunaarummi oqarpoq, nangillunilu:

- Naalakkersuisut Inatsisartunullu ilaasortat: Tamat oqartussaaqataanerat illersorneqarlunilu apeqqusiisinnaasunik paasissutissiisinnaasunillu tusagassiortoqassappat ilissi aamma pisariaqartippatsigit.